લખનૌ, 28 ફેબ્રુઆરી 2026: ઉત્તર પ્રદેશ એસટીએફની નોઈડા યુનિટ અને આગ્રા પોલીસની સંયુક્ત ટીમે એક મોટી કાર્યવાહીમાં કુખ્યાત ઈનામી બદમાશ પવન ઉર્ફે કલ્લુને ઠાર કર્યો છે. 27 ફેબ્રુઆરી 2026ના રોજ આગ્રાના એકતા પોલીસ સ્ટેશન વિસ્તારમાં થયેલી અથડામણ દરમિયાન પવન ગંભીર રીતે ઘાયલ થયો હતો, જેનું સારવાર દરમિયાન હોસ્પિટલમાં મોત નીપજ્યું છે.
પોલીસના જણાવ્યા અનુસાર, મૃતક બદમાશની ઓળખ પવન ઉર્ફે કલ્લુ (રહે. સિરૌલી, ગાઝિયાબાદ) તરીકે થઈ છે. તે શાસન દ્વારા ચિહ્નિત કુખ્યાત રણદીપ ભાટી – અમિત કસાના ગેંગનો સક્રિય શૂટર હતો. પવન પર હત્યાના 4 અને ખંડણીના 2 સહિત કુલ 18 થી વધુ ગુનાહિત કેસો નોંધાયેલા હતા. આગ્રાના તાજગંજ પોલીસ સ્ટેશનમાં નોંધાયેલા ખંડણીના કેસમાં તે વોન્ટેડ હતો અને તેના પર 50 હજાર રૂપિયાનું ઈનામ જાહેર કરવામાં આવ્યું હતું.
પોલીસ રેકોર્ડ મુજબ, વર્ષ 2021માં એક હત્યાના કેસમાં તેના પર 1 લાખ રૂપિયાનું ઈનામ હતું, ત્યારે દિલ્હી પોલીસે તેની ધરપકડ કરી હતી. જેલવાસ દરમિયાન તે હરિયાણાની કુખ્યાત હિમાંશુ ભાઉ ગેંગના સંપર્કમાં આવ્યો હતો. 2025માં જેલમાંથી બહાર આવ્યા બાદ તેણે દિલ્હી અને પશ્ચિમ ઉત્તર પ્રદેશમાં મોટા પાયે ખંડણી ઉઘરાવવાનું શરૂ કર્યું હતું. પોલીસને શંકા છે કે તે કોઈ મોટી ઘટનાને અંજામ આપવાની ફિરાકમાં હતો.
એન્કાઉન્ટર બાદ સર્ચ ઓપરેશનમાં પોલીસને મોટી માત્રામાં કારતૂસ અને હથિયારો મળી આવ્યા છે. આશ્ચર્યજનક વાત એ છે કે, બદમાશ પાસેથી મળેલી 9 એમએમ (9mm) પિસ્તોલ વર્ષ 2016માં ગૌતમબુદ્ધ નગરના બિસરખ વિસ્તારમાં એક કોન્સ્ટેબલ મોનુ ધીમન પાસેથી લૂંટવામાં આવી હતી. આ પિસ્તોલની રિકવરીથી પોલીસને ઘણા જૂના કેસો ઉકેલવામાં મદદ મળી શકે તેમ છે.
આ પણ વાંચોઃ રોહિત શેટ્ટી ફાયરિંગ કેસ: નેપાળથી મળ્યું ફંડિંગ, આંતરરાષ્ટ્રીય કાવતરું આવ્યું
