કટરા, 30 ડિસેમ્બર: વર્ષ 2025ના વિદાય અને નવા વર્ષ 2026ના આગમન પૂર્વે માતા વૈષ્ણો દેવીના દરબારમાં આસ્થાનું ઘોડાપૂર ઉમટ્યું છે. દેશના ખૂણેખૂણેથી હજારો શ્રદ્ધાળુઓ માતા રાણીના આશીર્વાદ લેવા કટરા પહોંચી રહ્યા છે. કટરા સ્થિત દર્શની ડ્યોઢી પર ભક્તોની લાંબી કતારો જોવા મળી રહી છે, જ્યાં સમગ્ર વાતાવરણ ભક્તિમય બની ગયું છે.
- ભક્તોની અતૂટ શ્રદ્ધા અને દેશ માટે શાંતિની પ્રાર્થના
માતાના દર્શન કરવા પહોંચેલા શ્રદ્ધાળુઓ પોતાની વ્યક્તિગત મનોકામનાઓ સાથે દેશમાં સુખ, શાંતિ અને સમૃદ્ધિની પ્રાર્થના કરી રહ્યા છે. ઉદયપુરથી 30 લોકોના જૂથ સાથે આવેલા એક પ્રવાસીએ જણાવ્યું હતું કે, “અહીંની વ્યવસ્થા ખૂબ જ સંતોષકારક છે. શ્રાઈન બોર્ડ અને વહીવટીતંત્રનું સંચાલન પ્રશંસનીય છે. અમે અહીંથી માતાના દર્શન કરી દેશની ઉન્નતિ માટે પ્રાર્થના કરીશું.” પ્રથમવાર આવેલા ભક્તોએ કટરાના માહોલને ‘સ્વર્ગ સમાન’ ગણાવ્યો હતો.
- સુરક્ષા અને સુવિધા માટે શ્રાઈન બોર્ડ સજ્જ
નવા વર્ષમાં ભક્તોની ભારે ભીડને ધ્યાનમાં રાખીને શ્રી માતા વૈષ્ણો દેવી શ્રાઈન બોર્ડ દ્વારા અગાઉથી જ તૈયારીઓ કરી લેવામાં આવી છે. 23 ડિસેમ્બરે યોજાયેલી ઉચ્ચ સ્તરીય બેઠકમાં સુરક્ષા વ્યવસ્થાની સમીક્ષા કરવામાં આવી હતી. બોર્ડના મુખ્ય કાર્યકારી અધિકારી (CEO) સચિન કુમાર વૈશ્યના જણાવ્યા અનુસાર, યાત્રાનું નિયમન RFID (Radio Frequency Identification) આધારિત એક્સેસ કંટ્રોલ દ્વારા કરવામાં આવશે. માત્ર માન્ય RFID કાર્ડ ધરાવતા શ્રદ્ધાળુઓને જ આગળ વધવા દેવામાં આવશે.
મુખ્ય ચેકપોઇન્ટ્સ પર વધારાના હેન્ડહેલ્ડ સ્કેનર્સ અને સુરક્ષાકર્મીઓ તૈનાત કરવામાં આવ્યા છે જેથી કોઈ પણ પ્રકારની ગેરરીતિ કે અસુવિધા ન થાય. લેફ્ટનન્ટ ગવર્નર (જેઓ બોર્ડના અધ્યક્ષ છે) ના નિર્દેશ પર જિલ્લા વહીવટીતંત્ર અને સુરક્ષા એજન્સીઓ સાથે સતત સંકલન સાધવામાં આવી રહ્યું છે. ભક્તોને કોઈપણ મુશ્કેલી વિના દર્શન થાય તે માટે શ્રાઈન બોર્ડ દ્વારા વિશેષ રૂટ મેનેજમેન્ટ કરવામાં આવ્યું છે. 8-10 વર્ષથી સતત દર્શન માટે આવતા શ્રદ્ધાળુઓએ પણ સ્વીકાર્યું છે કે વર્ષોવર્ષ અહીં સુવિધાઓમાં ધરખમ સુધારો થઈ રહ્યો છે. હાલ કટરામાં મધ્યમ ઠંડી અને સુખદ વાતાવરણ છે, જે યાત્રીઓ માટે સાનુકૂળ બની રહ્યું છે.
આ પણ વાંચોઃ મુંબઈના ભાંડુપમાં BEST બસ અકસ્માતમાં 4 લોકોના મોત
