ડીસામાં 105 જેટલા સિંગલ પિલરથી બન્યો ગુજરાતનો સૌથી લાંબો 3.7 કિ.મીનો એલિવેટેડ બ્રિજ
ડીસાઃ બનાસકાંઠા જિલ્લાનું મુખ્ય વેપારી મથક ડીસા શહેરમાંથી નેશનલ હાઇવે પસાર થાય છે, જેને કારણે ટ્રાફિકની મોટી સમસ્યા માથાના દુઃખાવારૂપ બની હતી. સાંજના સમયે તો રોડ ક્રોસ કરવો મુશ્કેલ બનતો હતો. ત્યારે શહેરમાંથી પસાર થતા હાઈ વે પર ફ્લાઈ ઓવરબ્રીજ બનાવવામાં આવ્યો છે. 105 સિંગલ પિલર પર વિધાઉટ લુક ધરાવતો ફ્લાઇ-ઓવર બ્રિજ લોકાર્પણ માટે તૈયાર છે. 3.7 કિલોમીટર લાંબો અને અંદાજિત અઢીસો કરોડની રકમથી બ્રિજ તૈયાર થયો છે, જેનાથી ડીસા શહેર તેમજ આજુબાજુના તાલુકાઓમાં ટ્રાફિક સમસ્યાનો અંત આવશે.
બનાસકાંઠાના સરહદી વિસ્તારના વાવ, થરાદ, સુઈગામ, ભાભર, કાંકરેજ દિયોદર, ધાનેરા આ તમામ તાલુકાઓ અને જ્યારે મુખ્ય મથક પાલનપુર આવવું પડતું ત્યારે ડીસાના ભારેખમ ટ્રાફિકમાંથી પસાર થવું પડતું હતું. શહેરમાંથી પસાર થતા નેશનલ હાઈવેને કારણે અનેક વાર અકસ્માતો થતા હતા, જેમાં શહેરના નિર્દોષ લોકો મોતને ભેટ્યા હતા. આ બાબતને ગંભીરતાથી લઇ નેશનલ હાઇવે ઓથોરિટી દ્વારા ડીસા શહેરની મધ્યમાંથી પસાર થતા નેશનલ હાઈવે પર 250 કરોડના ખર્ચે 3.7 કિલોમીટર લાંબો વિધાઉટ લુક એલિવેટેડ બ્રિજ બનાવવામાં આવ્યો છે. આ બ્રિજને કારણે ટ્રાફિકની સમસ્યા કાયમી ઉકેલ આવશે તેમજ કંડલા અને મુન્દ્રા પોર્ટ પર જતાં વાહનોને ટ્રાફિકની સમસ્યાથી છુટકારો મળશે. ડીસાના ધારાસભ્ય શશિકાંત પંડ્યાએ જણાવ્યું હતું કે સિંગલ 105 પિલર પર વિધાઉટ લુક ધરાવતો આ ફ્લાઇ-ઓવર બ્રિજ છે. અગાઉ 2.75 કિલોમીટર ધરાવતો સુરતનો ફ્લાઇ-ઓવર બ્રિજ બન્યો હતો. અંદાજિત 3.7 કિલોમીટરની લંબાઈ ધરાવતો આ ફ્લાઇ-ઓવર બ્રિજ અંદાજિત 250 કરોડની રકમ ભારત સરકારે ડીસાને આપી છે. આ ફ્લાઈ ઓવરબ્રીજની ખાસિયત એ છે,કે ગુજરાતનો સૌથી લાંબો એલિવેટેડ કોરિડોર છે. આ બ્રીજ પરથી 100km પ્રતિ કલાકની સ્પીડે વાહન જઈ શકશે, બ્રીજની 3.7 કિલોમીટરની લંબાઈ છે. અને 250 કરોડ રૂપિયા આ બ્રિજનો કુલ અંદાજિત ખર્ચ થયો છે. આ બ્રિજમાં 80 હજાર ઘન મીટર કોંક્રિટ વપરાયું છે, તેમજ 10500 ટન સ્ટીલનો જથ્થો વાપરવામાં આવ્યો ડીસા એલિવેટેડ કોરિડોરમાં ટ્રાફિક માટે 4 લેન ઉપર તેમજ 4 લેન નીચે તથા 2 લેનવાળા બંને તરફના સર્વિસ રોડનો સમાવેશ કરાયો છે.
