મુંબઈઃ NCB મુંબઈએ બહુરાષ્ટ્રીય ડ્રગ્સ સિન્ડિકેટનો પર્દાફાશ કર્યો છે અને બે અલગ-અલગ કાર્યવાહીમાં ત્રણ વિદેશીઓ સહિત નવ શખ્સોની ધરપકડ કરી હતી. તેમની પાસેથી 135 કરોડ રૂપિયાનું ડ્રગ્સ જપ્ત કરવામાં આવ્યું હતું. તેમની પાસેથી 6.9 કિલો કોકેઈન અને લગભગ 200 કિલો અલ્પ્રાઝોલમ જપ્ત કરવામાં આવ્યું હતું. ધરપકડ કરાયેલા ત્રણ વિદેશી નાગરિકોમાં બે બોલિવિયન મહિલાઓનો પણ સમાવેશ થાય છે. બંને પાસેથી પાંચ કિલો કોકેઈન જપ્ત કરવામાં આવ્યું હતું.
NCBના ડેપ્યુટી ડાયરેક્ટર જનરલ સંજય કુમાર સિંહે જણાવ્યું કે, આ લોકોની મુંબઈના ખેતવાડી વિસ્તારની એક હોટલમાંથી ધરપકડ કરવામાં આવી છે. તેઓ ટૂથપેસ્ટ, કપડા, કોસ્મેટિક ટ્યુબ, સાબુ, શૂઝ અને મેકઅપ કીટમાં ડ્રગ્સ છુપાવતા હતા. પાવડર ઉપરાંત, દવાઓ પ્રવાહી અને પેસ્ટના રૂપમાં પણ છુપાવવામાં આવી હતી. બંને મહિલાઓને બ્રાઝિલના સાઓ પાઉલો સ્થિત ગેંગ દ્વારા ડ્રગ્સ સાથે ભારત મોકલવામાં આવી હતી, તેમણે જણાવ્યું હતું કે, સિન્ડિકેટનો નેતા પણ બ્રાઝિલમાં છે. તેઓને ડ્રગ્સની દાણચોરીના દરેક રાઉન્ડ માટે ત્રણ હજાર યુએસ ડોલર મળતા હતા.
બીજા ઓપરેશનમાં NCBની ટીમે સપ્ટેમ્બરમાં ખારગઢમાંથી નાઈજીરિયાના પોલ ઈકેના ઉર્ફે બોસમેનની ધરપકડ કરી હતી. તેની પાસેથી બે કિલો કોકેઈન જપ્ત કરવામાં આવ્યું હતું. તેની પૂછપરછના આધારે સાકીર અને સુફીયાનને ગુજરાતના સુરતમાંથી ઝડપી લેવામાં આવ્યા હતા. મુંબઈ એનસીબીએ તમામ આરોપીઓના રિમાન્ડ મેળવવાની કવાયત શરૂ કરી છે. તેમજ સમગ્ર રેકેટમાં સંડોવાયેલા અન્ય આરોપીઓને ઝડપી લેવા માટે મુંબઈ એનસીબીએ કવાયત તેજ કરી છે.
(PHOTO-FILE)
