PM મોદીએ વીર બાળ દિવસ નિમિત્તે સાહિબઝાદાઓના અદ્વિતીય બલિદાનને શ્રદ્ધાપૂર્વક યાદ કર્યાં
નવી દિલ્હી 26 ડિસેમ્બર 2025ઃ Veer Bal Diwas પ્રધાનમંત્રી નરેન્દ્ર મોદીએ ‘વીર બાળ દિવસ’ ના અવસરે સાહિબઝાદાઓના અદ્વિતીય બલિદાનને શ્રદ્ધાપૂર્વક યાદ કર્યું હતું. તેમણે કહ્યું કે, વીર બાળ દિવસ એ સાહિબઝાદાઓના સાહસ, ત્યાગ અને બલિદાનને યાદ કરવાનો દિવસ છે.
પીએમ મોદીએ ‘X’ પર સંદેશ શેર કર્યો: ‘દ્રઢ સંકલ્પ અને ધર્મનિષ્ઠા સાથે જોડાયેલો દિવસ’
પીએમ મોદીએ સોશિયલ મીડિયા પ્લેટફોર્મ ‘X’ પર પોતાના સંદેશમાં જણાવ્યું હતું કે, આ અવસરે માતા ગુજરી જીની અડગ આસ્થા અને શ્રી ગુરુ ગોવિંદ સિંહ જીના અમર ઉપદેશોનું પણ સ્મરણ કરવામાં આવે છે. તેમણે ઉમેર્યું કે વીર બાળ દિવસ એ સાહસ, દ્રઢ સંકલ્પ અને ધર્મનિષ્ઠા સાથે જોડાયેલો દિવસ છે.
વધુ વાંચો: જયપુરમાં બે સમુદાયો વચ્ચે અથડામણ, ટોળાએ પોલીસ પર પથ્થરમારો કર્યો
આવનારી પેઢીઓને આપતા રહેશે નિરંતર પ્રેરણા
પ્રધાનમંત્રીએ કહ્યું કે સાહિબઝાદાઓનું જીવન અને તેમના આદર્શો આવનારી પેઢીઓને હંમેશા પ્રેરણા આપતા રહેશે. તેમણે દેશવાસીઓને સાહિબઝાદાઓના મૂલ્યોને જીવનમાં ઉતારી રાષ્ટ્ર નિર્માણમાં યોગદાન આપવા આહવાન કર્યું હતું.
બલિદાનનો ગૌરવશાળી ઇતિહાસ
ઉલ્લેખનીય છે કે શીખોના દસમા ગુરુ, શ્રી ગુરુ ગોવિંદ સિંહ જીના ચાર પુત્રો હતા: સાહિબઝાદા અજીત સિંહ, સાહિબઝાદા જુઝાર સિંહ, સાહિબઝાદા જોરાવર સિંહ અને સાહિબઝાદા ફતેહ સિંહ.
ચમકૌરનું યુદ્ધ: સાહિબઝાદા અજીત સિંહ અને સાહિબઝાદા જુઝાર સિંહે વર્ષ 1705માં ચમકૌરના યુદ્ધમાં મુગલ સેના સામે લડતા લડતા વીરગતિ પ્રાપ્ત કરી હતી.
સર્વોચ્ચ બલિદાન: નાના સાહિબઝાદા જોરાવર સિંહ અને ફતેહ સિંહે સરહિંદમાં ઇસ્લામ સ્વીકારવાનો ઇનકાર કર્યો, જેના પરિણામે તેમને જીવતા દીવાલમાં ચણી દેવામાં આવ્યા હતા. આ પીડા વચ્ચે માતા ગુજરી જીએ પણ પોતાના પ્રાણ ત્યાગ્યા હતા.
સાહિબઝાદાઓનું આ સર્વોચ્ચ બલિદાન ભારતીય ઇતિહાસમાં ધર્મ, સત્ય અને માનવીય મૂલ્યોની રક્ષા માટે આપવામાં આવેલા અદ્વિતીય ઉદાહરણ તરીકે યાદ કરવામાં આવે છે. તેમના શૌર્ય અને અટૂટ આસ્થાને નમન કરવા માટે દર વર્ષે 26 ડિસેમ્બરને ‘વીર બાળ દિવસ’ તરીકે ઉજવવામાં આવે છે.
વધુ વાંચો: ચીન-પાકિસ્તાનની મિત્રતા ભારતની સુરક્ષા માટે ચિંતાજનક: US રિપોર્ટ
