દિલ્હી : માનહાનિ કેસમાં મુશ્કેલીમાં ફસાયેલા રાહુલ ગાંધીને ઝારખંડ હાઈકોર્ટમાંથી રાહત મળી છે. વાસ્તવમાં, હાઈકોર્ટે મંગળવાર, 4 જુલાઈના રોજ સુનાવણી કરતી વખતે રાહુલ ગાંધી વિરુદ્ધ શિક્ષાત્મક કાર્યવાહી પર હાલમાં રોક લગાવી દીધી છે. હાઈકોર્ટ હવે આ મામલે 16 ઓગસ્ટે સુનાવણી કરશે. વર્ષ 2019માં કર્ણાટકમાં એક જનસભા દરમિયાન રાહુલ ગાંધીએ પોતાના એક નિવેદનમાં કહ્યું હતું કે ‘ બધા ચોરોની અટક મોદી જ કેમ છે?’ રાહુલ ગાંધીના નિવેદન બાદ દેશમાં અલગ-અલગ જગ્યાએ તેમની સામે માનહાનિના કેસ દાખલ કરવામાં આવ્યા હતા.
ઝારખંડ હાઈકોર્ટના જસ્ટિસ સંજય કુમાર દ્વિવેદીની કોર્ટમાં રાહુલ ગાંધી વિરુદ્ધ માનહાનિના કેસની સુનાવણી થઈ. સુનાવણી દરમિયાન તમામ પક્ષકારોને સાંભળ્યા બાદ કોર્ટે અરજદાર પ્રદીપ મોદીને જવાબ દાખલ કરવાનો નિર્દેશ આપ્યો હતો. આ સાથે જ રાહુલ ગાંધીને રાહત આપતા કોર્ટે આગામી સુનાવણી સુધી કોઈપણ શિક્ષાત્મક કાર્યવાહી પર રોક લગાવી દીધી છે.
રાહુલ ગાંધીને તેમના નિવેદન બદલ સુરત સેશન્સ કોર્ટે બે વર્ષની સજા ફટકારી છે. જેના કારણે રાહુલ ગાંધીએ જનપ્રતિનિધિત્વ કાયદા હેઠળ સંસદનું સભ્યપદ ગુમાવ્યું હતું. રાંચીમાં બીજેપી નેતા પ્રદીપ મોદીએ રાહુલ ગાંધી વિરુદ્ધ માનહાનિનો કેસ દાખલ કર્યો છે. આ કેસની સુનાવણી સાંસદ-ધારાસભ્ય કોર્ટમાં ચાલી રહી હતી. એમપી એમએલએ કોર્ટે રાહુલ ગાંધીને વ્યક્તિગત રીતે કોર્ટમાં હાજર રહેવાનો નિર્દેશ આપ્યો હતો.
