સાઉદી એરપોર્ટ બ્લાસ્ટ: ભારતીય નાગરિકનું નિધન, પરિવાર આઘાતમાં

ન્યુ દિલ્હી, 12 ઓક્ટોબર 2026: સાઉદી અરેબિયાની રાજધાની રિયાધમાં થયેલા ભીષણ હુમલામાં ભારતીય નાગરિક મોહમ્મદ યુસુફ અલીનું સારવાર દરમિયાન દુઃખદ અવસાન થયું છે. મૂળ હૈદરાબાદના વતની એવા યુસુફ અલી ઉપરાંત આ હુમલામાં તેમના પરિવારના અન્ય સભ્યો પણ ગંભીર રીતે ઘાયલ થયા છે. ભારતીય દૂતાવાસના જણાવ્યા અનુસાર, આ દુર્ઘટનામાં ઘાયલ થયેલા ત્રણ ભારતીય નાગરિકો હાલ આઈસીયુમાં દાખલ છે, જોકે તેમની હાલત સ્થિર હોવાનું જણાવવામાં આવ્યું છે. આ સિવાય અન્ય બે ઘાયલોને સામાન્ય વોર્ડમાં રાખવામાં આવ્યા છે, જ્યારે બાકીના ઘાયલોને હોસ્પિટલમાંથી રજા આપવામાં આવી છે.

પ્રાપ્ત વિગતો મુજબ, રિયાધ સ્થિત કિંગ ખાલિદ આંતરરાષ્ટ્રીય એરપોર્ટ પર થયેલા આ હુમલામાં મોહમ્મદ યુસુફ અલી ગંભીર રીતે ઘાયલ થયા હતા. તેમને તાત્કાલિક સારવાર માટે હોસ્પિટલ ખસેડવામાં આવ્યા હતા, જ્યાં સારવાર દરમિયાન તેમનું મોત નીપજ્યું હતું. એઆઈએમઆઈએમના વડા અને સાંસદ અસદુદ્દીન ઓવેસીએ રવિવારે સોશિયલ મીડિયા પ્લેટફોર્મ ‘એક્સ’ પર આ કરૂણ ઘટનાની પુષ્ટિ કરી હતી. ઓવેસીના જણાવ્યા મુજબ, યુસુફ અલીના એક પુત્રના ઘૂંટણની સર્જરી ચાલી રહી છે, જ્યારે બીજા પુત્રના પગની ત્રણ આંગળીઓ કાપવી પડી છે. આ હુમલામાં તેમની પત્ની અને પુત્રી સુરક્ષિત છે, જ્યારે પરિવારની સાથે રહેલા તેમના કાકીના માથામાં ગંભીર ઈજા પહોંચી હતી, જોકે હાલ તેમની સ્થિતિ ખતરા બહાર છે.

ઘટનાની ગંભીરતાને ધ્યાનમાં રાખીને સાઉદી અરેબિયા સ્થિત ભારતીય દૂતાવાસે તાત્કાલિક પગલાં લીધા છે. દૂતાવાસે જણાવ્યું કે તેના અધિકારીઓએ તે તમામ હોસ્પિટલોની મુલાકાત લીધી છે જ્યાં ઘાયલ ભારતીય નાગરિકોને દાખલ કરવામાં આવ્યા છે. દૂતાવાસે ઘાયલોને ઉત્તમ તબીબી સુવિધાઓ ઉપલબ્ધ કરાવવા બદલ સાઉદી પ્રશાસનનો આભાર માન્યો છે અને પીડિત પરિવારને તમામ શક્ય મદદની ખાતરી આપી છે. સાંસદ અસદુદ્દીન ઓવેસીએ પણ વિદેશ મંત્રી એસ. જયશૈંકર પાસે આ મામલે તાત્કાલિક હસ્તક્ષેપ કરી પરિવારને મદદ કરવા અપીલ કરી હતી. વિદેશ મંત્રી એસ. જયશૈંકરે આ મોતના સમાચાર પર ગાઢ શોક વ્યક્ત કર્યો છે અને જણાવ્યું છે કે ભારતીય દૂતાવાસ પરિવારના સતત સંપર્કમાં છે.

• મૃતદેહ ભારત લાવવાની તજવીજ અને વૈશ્વિક તણાવ

ભારતીય દૂતાવાસે સ્પષ્ટ કર્યું છે કે મોહમ્મદ યુસુફ અલીના પાર્થિવ શરીરને વહેલી તકે ભારત મોકલવા માટે દૂતાવાસ દ્વારા તમામ જરૂરી સહાય પૂરી પાડવામાં આવી રહી છે. સ્થાનિક પ્રશાસન અને હોસ્પિટલના અધિકારીઓના સતત સંપર્કમાં રહીને ઘાયલોની સ્થિતિ પર પણ બાજ નજર રાખવામાં આવી રહી છે. ઉલ્લેખનીય છે કે, કિંગ ખાલિદ એરપોર્ટ પર થયેલા આ મોટા હુમલામાં કુલ 12 લોકોના મોત થયા હતા અને 300 થી વધુ લોકો ઘાયલ થયા હતા, જેમાં 11 ભારતીય નાગરિકો પણ સામેલ હતા. સાઉદી પ્રશાસને આ હુમલા પાછળ હૂતિ વિદ્રોહીઓનો હાથ હોવાનું જણાવ્યું છે.