વડોદરાઃ હાવરા અમદાવાદ એક્સપ્રેસ ટ્રેનમાંથી બોગસ આધારકાર્ડ સાથે ઝડપાયેલી બે બાંગ્લાદેશી યુવતીઓ સહિત ત્રણ યુવતીઓ વહેલી સવારે વડોદરાના નારી સંરક્ષણ ગૃહમાંથી ભાગી જતાં પોલીસે ત્રણેય યુવતીઓને ઝડપી પાડવા દોડધામ કરી મૂકી છે. ત્રણેય યુવતીઓ દિવાલ પાસે કચરાની ડોલ મુકી તેના પર ચઢીને નારી સંરક્ષણ ગૃહના કમ્પાઉન્ડની વોલ કૂદીને ફરાર થઈ ગઈ હોવાનું જાણવા મળ્યું છે.
પોલીસ સૂત્રોમાંથી જાણવા મળ્યા મુજબ અમદાવાદના પોલીસ કર્મચારીઓએ હાવડા અમદાવાદ એક્સપ્રેસ ટ્રેનમાંથી ત્રણ યુવતીઓ સાથે મુસાફરી કરી રહેલા શંકાસ્પદ યુવકને ઝડપી પાડયો હતો. વડોદરા રેલવે સ્ટેશન આવતાં તેમણે શંકાસ્પદ વ્યક્તિનો તથા ત્રણ યુવતીઓનો કબજો વડોદરા રેલવે પોલીસની મિસિંગ સેલ ટીમને સોંપ્યો હતો. પોલીસની પ્રાથમિક પૂછપરછમાં ઝડપાયેલા મૌસમી ઉર્ફે સારમીન મીંટુ શેખ (રહે -પશ્ચિમ બંગાળ),યાસ્મીન ઉર્ફે જન્નત જજમીયા મુસ્લિમ (બન્ને રહે -બાંગ્લાદેશ),પોપીબેગમ ઉર્ફે ફરજાના મોહમ્મદ શેખ (રહે-બાંગ્લાદેશ) અને નાજમુલ અલીબુદીન શેખ (રહે -પશ્ચિમ બંગાળ) હોવાનું બહાર આવ્યું હતું. જ્યારે ત્રણેય યુવતીઓના આધાર કાર્ડની ચકાસણી કરતા આધારકાર્ડમાં એડ્રેસ ભરૂચનું હોવાની વિગતો સપાટી પર આવતાં પોલીસ ચોંકી ઉઠી હતી. આ આધાર કાર્ડના આધારે યુવતીઓના ડોક્યુમેન્ટ મેળવી મામા નામના વ્યક્તિ પાસે બનાવ્યા હોવાની કબૂલાત કરી હતી. પોલીસે આરોપીઓ પાસેથી 03 બનાવટી આધાર કાર્ડ, 06 નંગ મોબાઇલ ફોન, રોકડા રૂપિયા, એટીએમ કાર્ડ તથા ટ્રેનની ટિકિટ સહિતનો મુદ્દામાલ કબજે કરી નાજમુલ વિરુદ્ધ ગુનો નોંધી વધુ તપાસ હાથ ધરી છે.
સૂત્રોના જણાવ્યા મુજબ બે બાંગ્લાદેશી સહિત ત્રણેય યુવતીઓને વડોદરાના નિઝામપુરામાં આવેલી નારી સંરક્ષણ ગૃહમાં રાખવામાં આવી હતી. વહેલી સવારે આ ત્રણ યુવતીઓ નારી સંરક્ષણ ગૃહના કર્મચારીઓ તેમજ સિક્યુરિટીને ચકમો આપી ફરાર થઇ જતાં ખળભળાટ મચી ગયો છે. 2 બાંગ્લાદેશી સહિત 3 યુવતીઓ ફરાર થઇ જતાં નારી સંરક્ષણ ગૃહની સિક્યોરિટીની પણ પોલમપોલ છતી થઇ છે. વહેલી સવારે નારી સંરક્ષણ ગૃહ દ્વારા પોલીસ કંટ્રોલને જાણ કરવામાં આવતા શહેર પોલીસે તંત્રની ફતેગંજ પોલીસ તેમજ ક્રાઇમ બ્રાચની ટીમ કામે લાગી ગઈ હતી.
મળેલી માહિતી પ્રમાણે આ ત્રણેય યુવતીઓ નારી સંરક્ષણ ગૃહમાથી કેવી રીતે ફરાર થઇ, અને કયા રસ્તા ઉપરથી કયા વાહનમાં બેસીને કઇ તરફ ગઇ તે જાણવા પોલીસે સંબંધિત સીસીટીવી ચેક કરવાની શરૂઆત કરી છે. જોકે પોલીસને કોઇ સગડ મળ્યાં નથી. ભોપાલમાં બે બાંગ્લાદેશી આતંકવાદી ઝડપાયા બાદ ફરાર બાંગલાદેશી યુવતીઓની પણ પૂછપરછ થઇ શકતી હતી. પરંતુ, નારી સંરક્ષણ ગૃહની ગંભીર બે દરકારીના કારણે 2 બાંગ્લાદેશી સહિત યુવતીઓ ફરાર થઇ જતાં ખળભળાટ મચી ગયો છે. આ બનાવ અંગે ફતેગંજ પોલીસે કાર્યવાહી હાથ ધરી છે.
