ન્યુયોર્ક, 8 સપ્ટેમ્બર 2026: અમેરિકી દક્ષિણ કમાન્ડે પ્રશાંત મહાસાગરમાં કુખ્યાત ગુનાહિત સંગઠન ‘લોસ ચોનેરોસ’ સાથે જોડાયેલી ઇક્વાડોરની એક શંકાસ્પદ બોટને મિસાઈલ હુમલો કરીને સમુદ્રમાં ડૂબાડી દીધી છે. અમેરિકાનો આરોપ છે કે આ જહાજ સમુદ્રમાં નશાની હેરાફેરી માટે ‘ફ્લોટિંગ ફ્યુઅલ સેન્ટર’ તરીકે કામ કરતું હતું. કાર્યવાહી પહેલા જહાજ પર સવાર તમામ લોકોને સુરક્ષિત રીતે નીચે ઉતારી લેવામાં આવ્યા હતા, જેને હવે ઇક્વાડોરના અધિકારીઓને સોંપવામાં આવશે. અમેરિકી સેનાએ આ ઓપરેશનનો લાઈવ વીડિયો પણ જાહેર કર્યો છે, જેમાં હેલિકોપ્ટર અને મિસાઈલ હુમલા દ્વારા જહાજને નષ્ટ કરવામાં આવતું નજરે પડે છે.
અમેરિકી સેના દ્વારા આ પ્રકારે જહાજોને નિશાન બનાવવાની ઘટનાઓમાં વધારો થયો છે. છેલ્લા બે અઠવાડિયાની અંદર જ આ પાંચમું જહાજ છે જેને અમેરિકાએ ડૂબાડ્યું છે. આ અગાઉ માછલી પકડવાની બોટ ‘મારિયા કેન્ડેલારીયા’ અને ‘કોન્ક્વિસ્ટા-2’ને પણ નિશાન બનાવાયા હતા, જેના સભ્યો અને માછીમારો પાછળથી મળી આવ્યા હતા. જોકે, આવા હુમલાઓની કાનૂની વૈદ્યતા અને અસરકારકતા સામે હવે ગંભીર સવાલો ઉઠી રહ્યા છે. ઇક્વાડોરના અધિકારીઓનું કહેવું છે કે, કેટલાક કિસ્સાઓમાં બચેલા લોકો સામે કોઈ ગુનાહિત પ્રવૃત્તિમાં સંડોવણી હોવાના પુરાવા મળ્યા નથી.
ટ્રમ્પ પ્રશાસન હવે માત્ર સમુદ્ર પૂરતું મર્યાદિત ન રહેતા લૈટિન અમેરિકન દેશો સાથે મળીને જમીન પર પણ આવા સંયુક્ત સૈન્ય અભિયાન ચલાવવાની રણનીતિ બનાવી રહ્યું છે. અમેરિકી રક્ષામંત્રીના જણાવ્યા અનુસાર, પનામા, કોલંબિયા, ગ્વાટેમાલા અને હોન્ડુરાસ જેવા દેશો સાથે સંયુક્ત ઓપરેશન માટે ચર્ચાઓ ચાલી રહી છે. અગાઉ માર્ચ મહિનામાં ઇક્વાડોરે પણ અમેરિકા સાથે આવા સંયુક્ત અભિયાનો શરૂ કર્યા હતા.
