સાવધાન! જૂનો સ્માર્ટફોન વેચતા પહેલા આ 5 કામ જરૂર કરજો, નહીં તો પસ્તાશો
આજના ડિજિટલ યુગમાં સ્માર્ટફોન હવે માત્ર વાતચીતનું સાધન નથી રહ્યો, પરંતુ તે આપણી અંગત જિંદગી અને નાણાકીય વ્યવહારોની ‘તિજોરી’ બની ગયો છે. જ્યારે પણ આપણે નવો ફોન ખરીદવા માટે જૂનો ફોન વેચીએ છીએ, ત્યારે અજાણતામાં કરેલી નાની ભૂલ પણ લાખોનું નુકસાન કરાવી શકે છે. મોટાભાગના લોકો માત્ર મેમરી કાર્ડ અને સિમ કાર્ડ કાઢીને ફોન વેચી દે છે, પરંતુ અસલી ખતરો ફોનમાં રહેલા ડિજિટલ ડેટામાં છુપાયેલો હોય છે.
ડેટા બેકઅપ: સૌથી પહેલું અને મહત્વનું પગલું
ફોન વેચતા પહેલા તેમાં રહેલા કોન્ટેક્ટ્સ, ફોટા, વીડિયો અને ડોક્યુમેન્ટ્સનો બેકઅપ લેવો અનિવાર્ય છે. જો તમે બેકઅપ લીધા વિના ફોન રીસેટ કરી દેશો, તો તમારો કિંમતી ડેટા કાયમ માટે ગુમાવવો પડી શકે છે. ગૂગલ ડ્રાઇવ (Google Drive) અથવા ક્લાઉડ સ્ટોરેજનો ઉપયોગ કરીને ડેટા સુરક્ષિત કરી લેવો જોઈએ જેથી નવા ફોનમાં તેને સરળતાથી મેળવી શકાય.
આ પણ વાંચોઃ મમતા બેનર્જીના રેલવે મંત્રી તરીકેના કાર્યકાળની નીતિ સામે NHRCની લાલ આંખ
તમામ એકાઉન્ટ્સમાંથી ‘લોગ-આઉટ’ કરો
ફોનમાં જી-મેઇલ, સોશિયલ મીડિયા (FB/Instagram) અને સૌથી મહત્વનું બેંકિંગ એપ્સ હંમેશા લોગ-ઇન હોય છે. જો તમે માત્ર એપ ડિલીટ કરશો તો પણ ડેટા રહી જવાની શક્યતા છે. તેથી, સેટિંગ્સમાં જઈને દરેક એકાઉન્ટમાંથી ‘સાઇન આઉટ’ (Sign Out) કરવું જોઈએ. ખાસ કરીને ગૂગલ આઈડી કે એપલ આઈડી રિમૂવ ન કરવાથી નવો ખરીદનાર તમારા ડેટા સુધી પહોંચી શકે છે.
બાયોમેટ્રિક ડેટા ડિલીટ કરો
ઘણા યુઝર્સ સ્ક્રીન લોક તો હટાવી દે છે, પણ તેમાં સેવ કરેલા ફિંગરપ્રિન્ટ (Fingerprint) અને ફેસ લોક (Face Unlock) ડિલીટ કરવાનું ભૂલી જાય છે. આ તમારી ઓળખ ચોરી થવાનું મોટું જોખમ છે. ફોન આપતા પહેલા તમામ બાયોમેટ્રિક વિગતો અને પાસવર્ડ સેટિંગ્સમાંથી ક્લિયર કરવા જોઈએ.
છેલ્લું અને અકસીર હથિયાર: ફેક્ટરી રીસેટ
જ્યારે તમામ બેકઅપ અને લોગ-આઉટની પ્રક્રિયા પૂર્ણ થાય, ત્યારે ફોનને ‘ફેક્ટરી રીસેટ’ (Factory Reset) કરવો જ જોઈએ. આ પ્રક્રિયાથી ફોન સોફ્ટવેરની દ્રષ્ટિએ બિલકુલ નવો બની જાય છે અને તમારો કોઈ પણ પર્સનલ ડેટા અંદર બચતો નથી.
ફોનની કન્ડિશન અને સફાઈ
જો તમે તમારા ફોનની સારી કિંમત મેળવવા માંગતા હોવ, તો તેને ભૌતિક રીતે પણ સાફ કરો. સ્ક્રીન ગાર્ડ બદલી નાખવું અને ચાર્જિંગ પોર્ટ સાફ કરવાથી ખરીદનાર પર સારી છાપ પડે છે અને તમે વધુ સારી ડીલ મેળવી શકો છો.
નિષ્ણાંતની સલાહ: સ્માર્ટફોન બદલવો સરળ છે, પરંતુ ડેટા લીક થવાથી થતું નુકસાન ભરપાઈ કરવું મુશ્કેલ છે. તેથી થોડી સમજદારી તમને મોટી મુસીબતમાંથી બચાવી શકે છે.
આ પણ વાંચોઃ દાંતીવાડા: રીંછની પજવણી કરનારા બે શખ્સો ઝડપાયાં
