નવી દિલ્હી, 03 સપ્ટેમ્બર 2026: પાકિસ્તાનના પંજાબ પ્રાંતમાં 100 વર્ષ જૂના હિન્દુ મંદિરને તોડી પાડવાના અહેવાલો અંગે ભારતે ગંભીર ચિંતા વ્યક્ત કરી હતી. ભારતે પાકિસ્તાન સરકાર પાસે આ ઘટનાની તાત્કાલિક તપાસ કરવાની માંગ પણ કરી હતી.
મીડિયાના પ્રશ્નોના જવાબમાં, વિદેશ મંત્રાલયના પ્રવક્તા રણધીર જયસ્વાલે જણાવ્યું હતું કે ભારતે નારોવાલના સિરાજ ગામમાં આવેલા એક સદી જૂના પૂજાસ્થળ પર તોડફોડના અહેવાલોની સ્પષ્ટ શબ્દોમાં નિંદા કરી છે.
ભારતે મંદિર તોડી પાડવા અંગે ચિંતા વ્યક્ત કરી
જાયસ્વાલે કહ્યું, “પાકિસ્તાનના નારોવાલમાં એક ઐતિહાસિક હિન્દુ મંદિર તોડી પાડવાના અહેવાલો અંગે અમે ગંભીર ચિંતા વ્યક્ત કરી છે. લઘુમતી સમુદાયના આ સદી જૂના પૂજાસ્થળમાં કરવામાં આવેલી તોડફોડની અમે સ્પષ્ટ શબ્દોમાં નિંદા કરીએ છીએ.”
વિદેશ મંત્રાલયે જણાવ્યું હતું કે સત્તાવાળાઓ દ્વારા મંદિરનું રક્ષણ કરવામાં નિષ્ફળતા ચિંતાજનક છે અને તે પાકિસ્તાનમાં લઘુમતી સમુદાયોની સુરક્ષા તથા ધાર્મિક સ્વતંત્રતા અંગે ચિંતાઓ ઊભી કરે છે.
જાયસ્વાલે કહ્યું, “સત્તાવાળાઓની બેદરકારી અને આ સદી જૂના મંદિરનું રક્ષણ કરવામાં તેમની નિષ્ફળતા ચિંતાનો વિષય છે. આવી ઘટનાઓ એ કડવી યાદ અપાવે છે કે પાકિસ્તાનમાં લઘુમતી સમુદાયો સતત અસુરક્ષિત છે અને તેમના ધાર્મિક અધિકારો તથા પૂજા-સ્થળોનું ગંભીર ઉલ્લંઘન થઈ રહ્યું છે.”
લાહોરથી લગભગ 130 કિલોમીટર દૂર આવેલા સિરાજ ગામમાં 100 વર્ષથી વધુ જૂનું એક મંદિર 21 ઓગસ્ટે તોડી પાડવામાં આવ્યું હતું. લઘુમતી સંગઠનોનો આરોપ છે કે ધાર્મિક કટ્ટરપંથીઓએ નજીકના મદ્રેસા સાથે તે જમીનને ભેળવી દેવાના ઈરાદે આ સ્થળને નિશાન બનાવ્યું હતું, જ્યારે પાકિસ્તાનના ‘ઇવેક્યુઈ ટ્રસ્ટ પ્રોપર્ટી બોર્ડ’ (ETPB)નો દાવો છે કે ભારે વરસાદને કારણે મંદિર ધરાશાયી થયું હતું.
વધુ વાંચો: ભારતીય વાયુસેનાએ ‘ખગંતક-243’ ગ્લાઇડ બોમ્બનું સફળ પરીક્ષણ કર્યું
