દિલ્હી:G20 સમિટ અંગે ચર્ચા કરવા કેન્દ્ર સરકારે દિલ્હીમાં રાજકીય પક્ષોના વડાઓની બેઠક બોલાવી છે.ભારતે 1 ડિસેમ્બરે સત્તાવાર રીતે G20 નું પ્રમુખપદ સંભાળ્યું.સરકારી સૂત્રોના જણાવ્યા અનુસાર ભારતીય જનતા પાર્ટીના અધ્યક્ષ જેપી નડ્ડા, કોંગ્રેસ અધ્યક્ષ મલ્લિકાર્જુન ખડગે, તૃણમૂલ કોંગ્રેસના અધ્યક્ષ અને પશ્ચિમ બંગાળના મુખ્યમંત્રી મમતા બેનર્જી, DMK પ્રમુખ અને તમિલનાડુના મુખ્યમંત્રી એમકે સ્ટાલિન પણ બેઠકમાં ભાગ લેશે.
આ ઉપરાંત તેલુગુ દેશમ પાર્ટીના અધ્યક્ષ ચંદ્રબાબુ નાયડુ અને બીજુ જનતા દળના અધ્યક્ષ અને ઓડિશાના મુખ્યમંત્રી નવીન પટનાયક બેઠકમાં ભાગ લેવાના છે.આ બેઠક સોમવારે સાંજે રાષ્ટ્રપતિ ભવન ખાતે યોજાશે.તેલંગાણા રાષ્ટ્ર સમિતિ (TRS) અને ભાજપ વચ્ચે ચાલી રહેલા રાજકીય યુદ્ધ વચ્ચે તેલંગાણાના મુખ્યમંત્રી કે ચંદ્રશેખર રાવ આ બેઠકમાં હાજરી આપે તેવી શક્યતા નથી.
હજુ સુધી, સરકારે જનતા દળ (યુનાઇટેડ) વતી પુષ્ટિ કરી નથી કે,બિહારના મુખ્યમંત્રી નીતિશ કુમાર બેઠકમાં ભાગ લેશે કે નહીં.વડાપ્રધાન નરેન્દ્ર મોદી આ બેઠકની અધ્યક્ષતા કરી શકે છે. આ સિવાય વિદેશ મંત્રી એસ જયશંકર, રાજ્યસભામાં ગૃહના નેતા અને વાણિજ્ય મંત્રી પીયૂષ ગોયલ અને નાણા મંત્રી નિર્મલા સીતારમણ પણ હાજર રહે તેવી શક્યતા છે.સમગ્ર બેઠકનું નેતૃત્વ કરી રહેલા સંસદીય કાર્ય મંત્રી પ્રહલાદ જોશી પણ હાજર રહેશે.
આ મીટિંગ દરમિયાન, રાજકીય પક્ષો સાથે ભારત માટે G20 ની અધ્યક્ષતા અને આગામી વર્ષોમાં તેનો અર્થ શું છે તે અંગે ચર્ચા કરવામાં આવશે. ભારતની અધ્યક્ષતામાં પ્રથમ G20 શેરપા બેઠક રવિવારે રાજસ્થાનના ઉદયપુરમાં શરૂ થઈ હતી.આવી 200 બેઠકોમાંથી આ પહેલી છે જે આગામી વર્ષમાં ભારતના 55 શહેરોમાં યોજાશે.આ મહિનાની શરૂઆતમાં ઇન્ડોનેશિયાએ આગામી વર્ષ માટે બાલી સમિટમાં પીએમ મોદીની હાજરીમાં ભારતને G20 અધ્યક્ષપદ સોંપ્યું હતું.
