ખુશખબરી ! યુકેએ ભારતીયો માટે યંગ પ્રોફેશનલ સ્કીમ વિઝા માટે બીજું ‘બેલેટ’ ખોલ્યું
દિલ્હી: બ્રિટેનની સરકારે દેશના વિઝા માટે ગ્રેજ્યુએશન લાયકાત ધરાવતા 18 થી 30 વર્ષની વયના ભારતીયો માટે ‘યુકે-ઈન્ડિયા યંગ પ્રોફેશનલ્સ સ્કીમ’ હેઠળ તેના બીજા ‘બેલેટ’ ખોલ્યા. ‘બેલેટ’ 27 જુલાઈના રોજ સમાપ્ત થશે. તે લાયક યુવા ભારતીયોને યુકેમાં બે વર્ષ સુધી રહેવા, કામ કરવાની અથવા અભ્યાસ કરવાની તક આપે છે. નવી દિલ્હીમાં બ્રિટિશ હાઈ કમિશને ટ્વીટ કર્યું, “યંગ પ્રોફેશનલ્સ સ્કીમનો બીજો ‘બેલેટ’ હવે ખુલી ગયો છે.”
બ્રિટિશ હાઈ કમિશને કહ્યું, “જો તમે અંડરગ્રેજ્યુએટ અથવા પોસ્ટગ્રેજ્યુએટ લાયકાત ધરાવતા 18-30 વર્ષની વયના ભારતીય નાગરિક છો, તો ઈન્ડિયા યંગ પ્રોફેશનલ્સ સ્કીમ વિઝા માટે અરજી કરવાનું વિચારો. ‘બેલેટ’ 27 જુલાઈના રોજ બપોરે 1.30 વાગ્યે બંધ થશે.” વર્ષ 2023 માટેની યોજના હેઠળ કુલ 3,000 સ્થાનો ઉપલબ્ધ છે અને UK વિઝા અને ઇમિગ્રેશન (UKVI) એ જણાવ્યું હતું કે ફેબ્રુઆરીમાં યોજાયેલા પ્રથમ ‘બેલેટ’માં મોટા ભાગના સ્થાનોને એનાયત કરવામાં આવ્યા હતા. બાકીની જગ્યાઓ આ મહિનાના ‘બેલેટ’માંથી રેન્ડમ પસંદ કરવામાં આવશે.
જો કે ‘બેલેટ’માં પ્રવેશ મફત છે, અરજદારોને કહેવામાં આવ્યું છે કે તેઓ માત્ર ત્યારે જ ભાગ લે જો તેઓ વિઝા માટે અરજી કરવાની યોજના ધરાવે છે, જેની કિંમત 259 પાઉન્ડ છે, અને તેઓ નાણાકીય, શૈક્ષણિક અને અન્ય જરૂરિયાતોને પૂર્ણ કરવા સક્ષમ છે.
ગયા વર્ષે નવેમ્બરમાં ઇન્ડોનેશિયામાં G20 સમિટમાં વડા પ્રધાન નરેન્દ્ર મોદી અને તેમના યુકે સમકક્ષ ઋષિ સુનક દ્વારા હસ્તાક્ષર કરાયેલ પારસ્પરિક વ્યવસ્થા હેઠળ બ્રિટિશ નાગરિકોને પણ ભારતમાં રહેવા અને કામ કરવા માટે સમાન વિઝા ઓફર કરવામાં આવશે.
