નવી દિલ્હી, 9 ઓક્ટોબર 2026: મુખ્ય ચૂંટણી કમિશનર જ્ઞાનેશ કુમારની જવાબદેહી અંગે શનિવારે જંતર-મંતર ખાતે યોજાનારા કોકરોચ જનતા પાર્ટીના પ્રસ્તાવિત પ્રદર્શન સામે દિલ્હી પોલીસે આકરું વલણ અપનાવ્યું છે. દિલ્હી પોલીસે સ્પષ્ટ કર્યું છે કે આ વિરોધ પ્રદર્શન માટે કોઈ મંજૂરી આપવામાં આવશે નહીં. આ વિસ્તારમાં ભારતીય નાગરિક સુરક્ષા સંહિતાની કલમ 163 લાગુ હોવાનું અને પાર્ટી દ્વારા પ્રદર્શનની માહિતી ખૂબ જ મોડી આપવામાં આવી હોવાનું પોલીસે જણાવ્યું છે. દિલ્હી પોલીસના જોઈન્ટ સીપી નૂપુર પ્રસાદે જણાવ્યું હતું કે, “અમને સીજેપીના સૌરવ દાસ તરફથી 10 ઓક્ટોબરે જંતર-મંતર પર વિરોધ પ્રદર્શન માટે એક અરજી મળી હતી. આ સૂચના પર વિચારણા કર્યા બાદ જાણવા મળ્યું કે માહિતી ખૂબ જ ટૂંકા સમયમાં આપવામાં આવી હતી. નિયમો અનુસાર કોઈપણ આયોજિત પ્રદર્શનના 10 દિવસ પહેલાં તંત્રને જાણ કરવાની હોય છે.”
જોઈન્ટ સીપી નૂપુર પ્રસાદે વધુમાં ઉમેર્યું હતું કે, “અગાઉ જ્યારે આ પક્ષને પ્રદર્શનની મંજૂરી આપવામાં આવી હતી, ત્યારે તેમણે કાયદાકીય નિર્દેશો અને પોતાની બાંહેધરીઓનું પાલન કર્યું નહોતું. તેથી કાયદાકીય સૂચનાઓનો અનાદર, જાહેર સુરક્ષા, શાંતિ અને વાહનવ્યવહારના નિયમનને ધ્યાનમાં રાખીને આ વખતે મંજૂરી અસ્વીકાર કરવામાં આવી છે.” તેમણે એ પણ સ્પષ્ટ કર્યું કે નવી દિલ્હી વિસ્તારમાં BNSS ની કલમ 163 હેઠળ પ્રતિબંધાત્મક હુકમો લાગુ છે અને આ નિયમોનો ભંગ કરનાર સામે કડક કાનૂની કાર્યવાહી કરવામાં આવશે.
દિલ્હી પોલીસે DMRC ને 57 મેટ્રો સ્ટેશનોના પ્રવેશ અને નિકાસ દ્વાર બંધ રાખવાની સૂચના આપી છે. આ મર્યાદાઓ શુક્રવાર રાતથી જ લાગુ કરવામાં આવી છે અને શનિવારે પરિસ્થિતિ સામાન્ય ન થાય ત્યાં સુધી ચાલુ રહી શકે છે. આ સ્ટેશનો પર ટ્રેનની ફ્રિકવન્સી પણ ઘટાડાઈ શકે છે. રેલ્વે દ્વારા શનિવારે સવારે 4 થી બપોરે 2 વાગ્યા વચ્ચે નવી દિલ્હી અને હઝરત નિઝામુદ્દીન રેલ્વે સ્ટેશને પહોંચતી મેલ અને એક્સપ્રેસ ટ્રેનો રદ કરવાનો આદેશ આપવામાં આવ્યો છે. શુક્રવારે બપોરે 2 વાગ્યા પછી ઉપડીને શનિવારે સવારે દિલ્હી પહોંચનારી કેટલીક રાજધાની એક્સપ્રેસ સહિતની મુખ્ય ટ્રેનોને પણ આ આદેશ લાગુ પડશે.
