કોઈ તહેવાર હોય કે ઘરે કોઈ ખાસ પ્રસંગ, મીઠાઈમાં જો ગરમાગરમ અને રસીલા ગુલાબ જાંબુ મળી જાય તો પ્રસંગનો આનંદ બમણો થઈ જાય છે. જો કે, ઘણી વખત ઘરે ગુલાબ જાંબુ બનાવતી વખતે તે અંદરથી કડક થઈ જતા હોય છે અથવા તો તળતી વખતે ફાટી જતા હોય છે. જો તમારી સાથે પણ આવું થતું હોય તો ચિંતા કરવાની જરૂર નથી. યોગ્ય સામગ્રી અને કેટલીક નાની નાની બાબતોનું ધ્યાન રાખીને તમે ઘરે જ બજાર જેવા પોચા અને રસદાર ગુલાબ જાંબુ સરળતાથી બનાવી શકો છો.
-
જરૂરી સામગ્રી
માવો (ખોયા): 250 ગ્રામ
મેંદો: 2 મોટી ચમચી
બેકિંગ સોડા: 1 ચપટી
દૂધ: જરૂરિયાત મુજબ
ઘી અથવા તેલ: તળવા માટે
ચાસણી માટે: ખાંડ 2 કપ, પાણી 2 કપ, એલચી 3 થી 4 અને ગુલાબજળ 1 નાની ચમચી (ઈચ્છા અનુસાર)
-
બનાવવાની રીત
ગુલાબ જાંબુ બનાવવા માટે સૌથી પહેલા એક વાસણમાં ખાંડ અને પાણી મિક્સ કરી મધ્યમ આંચ પર ગરમ કરીને ચાસણી તૈયાર કરો. ખાંડ ઓગળી જાય એટલે તેમાં વાટેલી એલચી ઉમેરી 5 થી 7 મિનિટ ઉકાળો. ગુલાબ જાંબુ માટે બહુ ઘટ્ટ ચાસણીની જરૂર હોતી નથી, માત્ર હળવી ચીકાશ આવે એટલે ગેસ બંધ કરી તેમાં ખુશબૂ માટે ગુલાબજળ ઉમેરો.
ત્યારબાદ એક મોટા વાસણમાં માવાને સરખી રીતે મસળી લો જેથી તેમાં કોઈ ગાંઠ ન રહે. હવે તેમાં મેંદો અને એક ચપટી બેકિંગ સોડા ઉમેરીને ધીમે-ધીમે મિક્સ કરો. જરૂર પડે તો થોડું દૂધ ઉમેરીને નરમ લોટ તૈયાર કરો. ધ્યાન રાખવું કે લોટને બહુ મસળવો નહીં, નહીંતર ગુલાબ જાંબુ કડક બની શકે છે. હવે આ મિશ્રણમાંથી નાના અને એકસરખા કદના ગોળા બનાવી લો. ગોળા બનાવતી વખતે તેમાં એક પણ તિરાડ (ક્રેક) ન રહે તેનું ખાસ ધ્યાન રાખવું, નહીંતર તળતી વખતે તે ફાટી શકે છે.
એક કડાઈમાં ઘી અથવા તેલ ધીમા તાપે ગરમ કરો. તેલ હળવું ગરમ થાય એટલે ગેસ ધીમો રાખીને ગુલાબ જાંબુ ઉમેરો અને તેને હળવા હાથે સતત ફેરવતા રહી સોનેરી બ્રાઉન થાય ત્યાં સુધી તળો. ત્યારબાદ તેને તેલમાંથી કાઢી 1 થી 2 મિનિટ ઠંડા થવા દો અને પછી હળવી ગરમ ચાસણીમાં ડૂબાડી દો. ઓછામાં ઓછા 1 થી 2 કલાક સુધી તેને ચાસણીમાં રહેવા દો જેથી ચાસણી અંદર સુધી ઉતરી જાય.
