વોશિંગ્ટન, 21 ઑક્ટોબર, 2026: Attack on Hindu temple in America અમેરિકાના ઈલિનોઈસ્થિત ઓરોરામાં આવેલા શ્રી વેંકટેશ્વર સ્વામી (બાલાજી) મંદિર પર એક નિયો-નાઝી (Neo-Nazi) દ્વારા કરવામાં આવેલા ગોળીબારને કારણે ચિંતાનું વાતાવરણ છે.
આ હુમલાના સંદર્ભમાં ભારતીય-અમેરિકન કોંગ્રેસ સભ્ય રાજા કૃષ્ણમૂર્તિના નેતૃત્વમાં 105 અમેરિકી સાંસદોના એક મોટા જૂથે મંગળવારે FBI (ફેડરલ બ્યુરો ઓફ ઇન્વેસ્ટિગેશન) ના ડિરેક્ટર કાશ પટેલને પત્ર લખીને આ મામલાની તપાસ ‘ફેડરલ હેટ ક્રાઇમ’ (નફરતભર્યા ગુના) તરીકે કરવાની માંગ કરી છે. સાંસદોએ અમેરિકામાં સતત વધી રહેલી ભારત-વિરોધી, હિન્દુ-વિરોધી અને દક્ષિણ એશિયાઈ લોકો પ્રત્યેની વંશીય નફરત પર ઊંડી ચિંતા વ્યક્ત કરી છે.
ઘટના સમયે મંદિરમાં હાજર હતા કૃષ્ણમૂર્તિ
11 ઓક્ટોબરે જ્યારે આ કથિત કાવતરું ઘડવામાં આવ્યું અને આરોપી પકડાયો, તે સમયે ભારતીય-અમેરિકન સાંસદ રાજા કૃષ્ણમૂર્તિ પોતાના પરિવાર સાથે એ જ શ્રી વેંકટેશ્વર સ્વામી મંદિરમાં પૂજા-અર્ચના કરી રહ્યા હતા. સાંસદોએ પોતાના પત્રમાં લખ્યું છે, ‘વંશીય નફરત, ધાર્મિક સ્થળ અને મોટા પાયે હિંસાની તૈયારીઓ ધરાવતો આ મામલો વ્યાપક ફેડરલ કાર્યવાહીની માંગ કરે છે.’
આ જૂથમાં ઈલિનોઇ હાઉસના તમામ ડેમોક્રેટિક પ્રતિનિધિઓ, કોંગ્રેસના તમામ ભારતીય-અમેરિકન સભ્યો અને સિનેટર ડિચ ડર્બિન, ટેમી ડકવર્થ, એન્ડી કિમ અને ક્રિસ વેન હોલેનનો સમાવેશ થાય છે.
19 વર્ષીય નિયો-નાઝી હુમલાખોરની ધરપકડ
આ કથિત કાવતરાના સંબંધમાં 11 ઓક્ટોબરે 19 વર્ષીય એલેક્ઝાન્ડ્રોસ પેપોરાકિસની ધરપકડ કરવામાં આવી હતી. પ્રોસિક્યુટર્સના જણાવ્યા અનુસાર, આરોપીએ મંદિરની બહાર એક વ્યક્તિ પર ગોળી ચલાવવાનો પ્રયાસ કર્યો હતો પરંતુ છેલ્લી ઘડીએ તેની રાઇફલ જામ થઈ ગઈ હતી.
પોતાને નાઝી વિચારધારાનો સમર્થક માનતા પેપોરાકિસે 8 પાનાનો એક મેનિફેસ્ટો (ઘોષણાપત્ર) લખ્યો હતો, જેમાં હિન્દુ પૂજા સ્થળ પર ભારતીય મૂળના લોકોને નિશાન બનાવવાનો ઉલ્લેખ હતો.
તપાસકર્તાઓએ તેની પાસેથી એક રાઇફલ, સેંકડો કારતૂસ, બોડી આર્મર (સુરક્ષા કવચ) અને અશ્વેત/શ્વેત વર્ચસ્વવાદી સામગ્રી જપ્ત કરી છે.
અમેરિકામાં ઓનલાઇન નફરત
આ માંગ એવા સમયે સામે આવી છે જ્યારે અમેરિકામાં દક્ષિણ એશિયાઈ લોકોને નિશાન બનાવીને ઓનલાઈન નફરત ફેલાવવા અંગે ચિંતાઓ વધી રહી છે. સપ્ટેમ્બર 2026 ના એક અહેવાલ મુજબ, જાન્યુઆરી 2025 થી જૂન 2026 વચ્ચે ‘X’ પર દક્ષિણ એશિયાઈ લોકો વિરુદ્ધ 542,000 થી વધુ હેટ પોસ્ટ્સ નોંધાઈ હતી.
જાન્યુઆરી 2024 થી જૂન 2026 વચ્ચે આવી નફરતભરી પોસ્ટ્સની માસિક સંખ્યામાં આશરે 240% નો વધારો થયો છે. ‘કાર્નેગી એન્ડોવમેન્ટ’ના સર્વે મુજબ, 2025 ની શરૂઆતથી અત્યાર સુધીમાં 48% ભારતીય-અમેરિકનોએ ઓનલાઈન વંશીય પોસ્ટ્સનો સામનો કરવો પડ્યો છે અને દર ચોથી વ્યક્તિને અપમાનજનક શબ્દોથી સંબોધવામાં આવી છે.
સાંસદોએ FBI ને પૂછ્યા સવાલો
105 સાંસદોના આ જૂથે FBI ને 29 ઓક્ટોબર સુધીનો સમય આપતાં તેમની પાસેથી કેટલાક મુદ્દાઓ પર લેખિત જવાબ માંગ્યા છે. સાંસદોએ FBI ને પૂછ્યું છે:
શું આ મામલાની તપાસ વંશીય, જાતીય અને ધાર્મિક પૂર્વગ્રહોને ધ્યાનમાં રાખીને કરવામાં આવી રહી છે?
શું આરોપીને કોઈ ઓનલાઈન પ્લેટફોર્મ અથવા અન્ય શંકાસ્પદ વ્યક્તિઓએ મદદ કરી હતી?
સંવેદનશીલ અને સંભવિત નિશાના પર રહેલા ધાર્મિક સ્થળોની સુરક્ષા માટે ગુપ્ત માહિતી સ્થાનિક એજન્સીઓ સાથે કેવી રીતે શેર કરવામાં આવી રહી છે?
શું FBI પાસે હિન્દુ-વિરોધી અને દક્ષિણ એશિયાઈ-વિરોધી પૂર્વગ્રહો સાથે જોડાયેલા જોખમો સામે લડવા માટે પૂરતા ભાષા નિષ્ણાતો, સ્ટાફ અને સંસાધનો ઉપલબ્ધ છે?
સાંસદોએ FBI ને વિનંતી કરી છે કે તેઓ તમામ સંબંધિત પુરાવાઓની તપાસ કરે, અપરાધો સામે યોગ્ય કાર્યવાહી કરે અને અસરગ્રસ્ત સમુદાયોની સુરક્ષા માટે શું પગલાં લેવામાં આવી રહ્યા છે તેની માહિતી આપે.
 મંદિર પર એક નિયો-નાઝી (Neo-Nazi) દ્વારા કરવામાં આવેલા ગોળીબારને કારણે){kind=link}