અંકારા, 23 ઓક્ટોબર 2026: ઉત્તર તુર્કીમાં ખાણ અકસ્માત સર્જાયો હતો, જેમાં બે લોકોના મોત થયા છે અને અન્ય પાંચ લોકો ઘાયલ થયા છે. બચાવકર્મીઓ હાલમાં ખાણની અંદર ફસાયેલા એક કામદાર સુધી પહોંચવાનો પ્રયાસ કરી રહ્યા છે. તબીબી ટીમો અને બચાવકર્મીઓ ઘટનાસ્થળે હાજર છે.
એક અધિકારીએ જણાવ્યું કે તુર્કીમાં એક ખાણમાં થયેલા વિસ્ફોટ બાદ બે કામદારોના મૃત્યુ થયા છે. આ ઘટનામાં અન્ય પાંચ કામદારો ઘાયલ થયા છે અને હાલમાં હોસ્પિટલમાં તેમની સારવાર ચાલી રહી છે.
અંદર ફસાયેલા કામદારને બચાવવાના પ્રયાસો ચાલી રહ્યા છે
તેમણે જણાવ્યું કે અકસ્માતને કારણે એક કામદાર અંદર ફસાઈ ગયો છે. બચાવકર્મીઓ તે કામદાર સુધી પહોંચવાનો પ્રયાસ કરી રહ્યા હતા. ખાણમાં વિસ્ફોટ થયા બાદ, ઓક્સિજનનો પુરવઠો જાળવી રાખવો એ સૌથી મોટો પડકાર છે; તેથી, બચાવ કામગીરી અત્યંત તાકીદ સાથે હાથ ધરવામાં આવી રહી છે.
વિસ્ફોટનું કારણ સ્પષ્ટ નથી
વિસ્ફોટનું કારણ હજુ સુધી જાણી શકાયું નથી. આ ઘટના બ્લેક સી (કાળો સમુદ્ર)ના કિનારે આવેલા ઝોંગુલદાક પ્રાંતના કિલીમલી શહેરમાં બની હતી. તબીબી ટીમો અને બચાવકર્મીઓ ઘટનાસ્થળે હાજર છે.
રાજ્યપાલે જણાવ્યું કે બે કામદારોની સ્થિતિ ગંભીર
ઝોંગુલદાકના ગવર્નર ઓસ્માન હાસીબેકતાશોગ્લુએ પત્રકારોને જણાવ્યું કે ઘાયલ કામદારોમાંથી બેની હાલત ગંભીર છે. તેમણે વધુમાં કહ્યું કે અન્ય એક ઘાયલ વ્યક્તિને સારવાર માટે રાજધાની અંકારાની હોસ્પિટલમાં લઈ જવામાં આવી રહી છે.
વધુ વાંચો: ‘તમામ 14 ભારતીયો સુરક્ષિત’ યમન કિનારે યાટ પર થયેલા હુમલા અંગે દૂતાવાસે આપી અપડેટ
