પ્રયાગરાજ: ઉત્તર પ્રદેશના પ્રયાગરાજમાં આવેલી એક દુકાન હાલમાં સમગ્ર પંથકમાં અને સોશિયલ મીડિયા પર ભારે ચર્ચાનો વિષય બની છે. આ ચર્ચાનું મુખ્ય કારણ દુકાનના બોર્ડ પર લખાયેલો એક અનોખો સંદેશ છે: ‘હે ભગવાન! આ દુકાન પર ઓછામાં ઓછા ગ્રાહકો મોકલજે.‘ સોશિયલ મીડિયા પર આ દુકાનનો વીડિયો વાયરલ થયા બાદ લોકો આશ્ચર્ય વ્યક્ત કરી રહ્યા છે. વધુ તપાસ કરતા માલૂમ પડ્યું છે કે દુકાનદારે મહિલાઓની સુરક્ષાને ધ્યાનમાં રાખીને તેમના પ્રવેશ પર સંપૂર્ણ પ્રતિબંધ મૂકી દીધો છે. દુકાનની બહાર સ્પષ્ટ અક્ષરોમાં લખવામાં આવ્યું છે કે, ‘આ દુકાન પર મહિલાઓનું આવવું મનાઈ છે, માત્ર પુરુષો જ આવી શકે છે.‘
દારૂડિયાઓથી કંટાળીને દુકાનદારે લીધો નિર્ણય
પ્રયાગરાજના રાજાપુર વિસ્તારમાં રહેતા દુકાનદાર ઘનશ્યામ બાબાએ દારૂડિયાઓની અસભ્ય હરકતોથી તંગ આવીને આ પગલું ભર્યું છે. ઘનશ્યામ બાબાના જણાવ્યા મુજબ, તેમની દુકાનની આસપાસ વસતી ઓછી છે અને સાંજના સમયે ત્યાં દારૂડિયાઓનો જમાવડો થાય છે. નશામાં ધૂત આ તત્વો રસ્તે જતી-આવતી મહિલાઓ અને દુકાને સામાન લેવા આવતી ગ્રાહક મહિલાઓ પર અશ્લીલ અને આપત્તિજનક ટિપ્પણીઓ (કોમેન્ટ્સ) કરતા હોય છે. આ અસભ્ય વર્તનને કારણે મહિલાઓ અત્યંત અસહજ અનુભવતી હતી. ભવિષ્યમાં મહિલાઓ સાથે કોઈ અનિચ્છનીય કે અપ્રિય ઘટના ન ઘટે, તે માટે તેમણે દુકાન પર મહિલાઓના આવવા પર રોક લગાવી દીધી છે.
રામચરિતમાનસની ચોપાઈઓ અને કબીરના દોહાથી સજ્જ દુકાન
ઘનશ્યામ બાબાએ પોતાની દુકાનની ચારેય તરફ રામચરિતમાનસની ચોપાઈઓ અને સંત કબીરના દોહાઓ લખાવ્યા છે. સોશિયલ મીડિયા પર આ દુકાન વાયરલ થયા બાદ સ્થાનિક લોકો અને નેટિઝન્સ અલગ-અલગ પ્રતિક્રિયાઓ આપી રહ્યા છે. સ્થાનિક લોકોનું કહેવું છે કે દુકાનદારની ચિંતા વ્યાજબી છે, પરંતુ દારૂડિયાઓની હરકતોની સજા મહિલાઓને આપવી યોગ્ય નથી. જે લોકો દારૂ પીને હોબાળો મચાવે છે અને મહિલાઓની છેડતી કરે છે, પોલીસ અને તંત્રે તેમના સામે કડક કાર્યવાહી કરવી જોઈએ.
