નવી દિલ્હી, 21 મે 2026: ટ્રેનો, મુસાફરો, સ્ટેશન પરિસર અને વિશાળ રેલ નેટવર્કની સુરક્ષા વધારવા માટે રેલવે AI (આર્ટિફિશિયલ ઇન્ટેલિજન્સ), ડ્રોન, સીસીટીવી વગેરે જેવા નવીનતમ ટેકનોલોજી સાધનોનો સઘન ઉપયોગ કરી રહી છે. રેલવે સુરક્ષા દળના બીટ સ્તરે ગુપ્ત માહિતી એકત્રિત કરવાની પ્રણાલીને મજબૂત કરીને આ કાર્ય મિશન મોડમાં હાથ ધરવામાં આવી રહ્યું છે. આજે નવી દિલ્હીમાં યોજાયેલી એક મહત્વપૂર્ણ ઉચ્ચ સ્તરીય સુરક્ષા સમીક્ષા બેઠકમાં, રેલવે મંત્રાલયે રાષ્ટ્રીય રાજધાનીમાં વરિષ્ઠ અધિકારીઓની ઉપસ્થિતિમાં દેશભરના ફિલ્ડ ઓફિસરો સાથે વ્યાપક પરામર્શ કર્યો હતો. આ બેઠકની અધ્યક્ષતા રેલવે ભવન ખાતે રેલવે મંત્રી અશ્વિની વૈષ્ણવે કરી હતી. રેલવે બોર્ડના ચેરમેન ઉપરાંત રેલવે રાજ્ય મંત્રીઓ વી. સોમન્ના અને રવનીત સિંહ બિટ્ટુ પણ ઉપસ્થિત હતા.
બેઠક દરમિયાન એ વાતની નોંધ લેવામાં આવી હતી કે છેલ્લા કેટલાક દિવસોમાં, તાજેતરની કેટલીક આગની ઘટનાઓ સહિતની બહુવિધ ઘટનાઓની પ્રારંભિક તપાસ દરમિયાન અસામાજિક તત્વોની સંડોવણી સામે આવી છે. ભારતીય રેલવેએ આ ઘટનાઓને ગંભીરતાથી લીધી છે અને RPF સક્રિયપણે તેમની તપાસ કરી રહી છે.
મુસાફરોને મુસાફરી દરમિયાન સાવધ અને સતર્ક રહેવા અપીલ કરાઈ
કેટલાક કિસ્સાઓમાં, રેલવે દ્વારા લેવામાં આવેલા તાત્કાલિક અને સક્રિય પગલાંથી મોટી દુર્ઘટનાઓ ટાળવામાં મદદ મળી હતી. એવું પણ અનુભવાયું હતું કે, ગુપ્તચર પ્રણાલીઓને મજબૂત કરવા અને ઇનપુટ્સની ઝડપી પ્રક્રિયા માટે ટેકનોલોજીના ઉપયોગ ઉપરાંત, રેલવે મુસાફરોને તેમની મુસાફરી દરમિયાન અને સ્ટેશન પરિસરમાં પ્રતીક્ષા કરતી વખતે અસામાજિક પ્રવૃત્તિઓને રોકવાના પ્રયાસોમાં સક્રિયપણે સમર્થન આપવા માટે વધુ પ્રોત્સાહિત કરશે. તેથી રેલવેએ મુસાફરોને મુસાફરી દરમિયાન સાવધ અને સતર્ક રહેવા વિનંતી કરી છે. રેલવે પરિસરમાં જોવા મળેલી કોઈ પણ શંકાસ્પદ પ્રવૃત્તિ અથવા શંકાસ્પદ વ્યક્તિ વિશે રેલવે હેલ્પલાઇન નંબર 139 પર તાત્કાલિક જાણ કરવી જોઈએ.
સુરક્ષા સમીક્ષા બેઠક દરમિયાન ચર્ચા સુધારેલી રિપોર્ટિંગ સિસ્ટમ દ્વારા ફિલ્ડમાંથી ગુપ્ત માહિતી એકત્રિત કરવાની પદ્ધતિઓને મજબૂત કરવા પર કેન્દ્રિત હતી. ટેકનોલોજી આધારિત સુરક્ષા પ્રણાલીઓને વધારવા, રેલવે નેટવર્કમાં સીસીટીવી કવરેજ વિસ્તારવા અને રેલવે બોર્ડ મુખ્યાલય અને ફિલ્ડ ઝોન વચ્ચે ઓપરેશનલ સુરક્ષા સંકલન સુધારવા પર પણ ભાર મૂકવામાં આવ્યો હતો. આ બેઠકમાં સાયબર સુરક્ષા મજબૂત કરવા, કેમેરાના સ્પષ્ટીકરણો (સ્પેસિફિકેશન્સ) અપગ્રેડ કરવા અને AI-આધારિત દેખરેખ અને મોનિટરિંગ સિસ્ટમ્સ તૈનાત કરવા પર પણ પ્રકાશ પાડવામાં આવ્યો હતો. આ ઉપરાંત બેઠકમાં સમગ્ર રેલવે નેટવર્કમાં વધુ અસરકારક સુરક્ષા વ્યવસ્થાપન માટે RPF અને સરકારી રેલવે પોલીસ (GRP) વચ્ચે માહિતીની આપ-લેની પદ્ધતિમાં સુધારો કરીને સંકલન મજબૂત કરવા પર ધ્યાન કેન્દ્રિત કરવામાં આવ્યું હતું.
