રાજસ્થાનમાં કોંગ્રેસને મોટો ફટકો,જ્યોતિ મિર્ધા અને સવાઈ સિંહ ચૌધરી ભાજપમાં જોડાયા
- રાજસ્થાન ચૂંટણી પહેલા કોંગ્રેસને મોટો ફટકો
- બે નેતાઓ ભાજપમાં જોડાયા
- કોંગ્રેસ ટિકિટ પર લોકસભા ચૂંટણી લડી ચૂકી છે મિર્ધા
- ભાજપ નાગૌર લોકસભા સીટ પરથી લડી શકે છે ચૂંટણી
જયપુર : રાજસ્થાનના રાજકારણ સાથે જોડાયેલા એક મોટા સમાચાર સામે આવ્યા છે. આ વર્ષના અંતમાં યોજાનારી વિધાનસભાની ચૂંટણી પહેલા કોંગ્રેસ પાર્ટીને મોટો ઝટકો લાગ્યો છે. કોંગ્રેસના પૂર્વ નેતાઓ જ્યોતિ મિર્ધા અને સવાઈ સિંહ ચૌધરી ભાજપમાં જોડાયા છે. રાજસ્થાન ભાજપના પ્રદેશ અધ્યક્ષ સીપી જોશીની હાજરીમાં બંને નેતાઓએ દિલ્હી બીજેપી હેડક્વાર્ટર ખાતે હાથ મિલાવ્યા હતા.
રાજસ્થાન વિધાનસભા ચૂંટણી અને લોકસભાની ચૂંટણીને ધ્યાનમાં રાખીને મોટો રાજકીય વિકાસ જોવા મળી રહ્યો છે. જ્યોતિ મિર્ધાને રાજસ્થાનના મોટા જાટ ચહેરા તરીકે જોવામાં આવે છે. જ્યોતિ મિર્ધાએ કોંગ્રેસની ટિકિટ પર નાગૌરથી લોકસભા ચૂંટણી લડી છે. સોનિયા ગાંધીએ 2009માં મિર્ધા માટે પ્રચાર પણ કર્યો હતો. જ્યારે સવાઈ સિંહ ખિંવસરથી કોંગ્રેસની ટિકિટ પર ચૂંટણી લડ્યા છે. તેઓ નિવૃત્ત આઈપીએસ છે.
જ્યોતિ મિર્ધા નાગૌરથી કોંગ્રેસના પૂર્વ સાંસદ છે. મિર્ધા ભાજપમાં જોડાવાથી ભાજપને નાગૌર બેઠક માટે મજબૂત ઉમેદવાર મળી ગયો છે. ભાજપ તેમને નાગૌર લોકસભા સીટ પરથી ચૂંટણીમાં ઉતારી શકે છે. જ્યોતિ મિર્ધા ગત લોકસભા ચૂંટણીમાં કોંગ્રેસ તરફથી લોકસભાના ઉમેદવાર હતા. તેણી એનડીએના ઉમેદવાર હનુમાન બેનીવાલ સામે હારી ગઈ હતી. હનુમાન બેનીવાલે ભાજપ સાથે ગઠબંધન કરીને ચૂંટણી લડી હતી. હવે તેમનું ભાજપ સાથેનું જોડાણ તૂટી ગયું છે. આવી સ્થિતિમાં ભાજપ નાગૌરથી મજબૂત ચહેરાની શોધમાં હતી.
