માત્ર તીખાશ જ નહીં, પણ લિજ્જત પણ વધારશે મરચાં; જાણો લીલા મરચાંની 4 ચટાકેદાર રેસીપી

ભારતીય રસોઈમાં મરચાં વગર સ્વાદ અધૂરો ગણાય છે. મરચું માત્ર ભોજનમાં તીખાશ લાવવાનું કામ નથી કરતું, પરંતુ જો તેને યોગ્ય રીતે બનાવવામાં આવે તો તે આખી વાનગીનો સ્વાદ બદલી શકે છે. લીલા મરચાંનો ઉપયોગ કરીને તમે ઘરે જ કેટલીક સ્વાદિષ્ટ અને પરંપરાગત વાનગીઓ બનાવી શકો છો. અહીં મરચાંમાંથી બનતી એવી 4 રેસીપી છે જે તમારા રોજિંદા ભોજનમાં સ્વાદનો નવો જ તડકો લગાવશે.

• મરચાંનું અથાણું

સૌ પ્રથમ લીલા મરચાંને બરાબર ધોઈને લંબાઈમાં કાપી લો. એક વાસણમાં મીઠું, હળદર અને રાઈના કુરિયા (સરસવનો પાવડર) મિક્સ કરો. હવે મરચાંને આ મિશ્રણમાં નાખીને બરાબર હલાવો. તૈયાર થયેલા આ મરચાંને કાચની સાફ બરણીમાં ભરો અને ઉપરથી સરસવનું તેલ ઉમેરો. તેને 2-3 દિવસ સુધી તડકામાં રાખવાથી તમારું સ્વાદિષ્ટ મરચાંનું અથાણું તૈયાર થઈ જશે.

• દહીંવાળા મરચાં

આ એક ખૂબ જ લોકપ્રિય સાઇડ ડિશ છે. તેને બનાવવા માટે લીલા મરચાંમાં વચ્ચેથી હળવો ચીરો પાડો. ગરમ સરસવના તેલમાં રાઈ, જીરું, વરિયાળી અને હળદર નાખીને મરચાંને સાંતળો. ત્યારબાદ તેમાં ફીણેલું દહીં અને મીઠું ઉમેરો. ધીમી આંચ પર ત્યાં સુધી પકાવો જ્યાં સુધી દહીંનું પાણી સુકાઈ ન જાય અને મસાલા મરચાં પર બરાબર કોટ થઈ જાય. આ દહીંવાળા મરચાં દાળ-ભાત કે પરાઠા સાથે ઉત્તમ લાગે છે.

• મરચાં વડા

જો તમને ક્રિસ્પી નાસ્તો ગમતો હોય તો મરચાં વડા શ્રેષ્ઠ વિકલ્પ છે. મોટા લીલા મરચાંને વચ્ચેથી કાપી તેના બીજ કાઢી લો. હવે એક વાસણમાં ચણાનો લોટ (બેસન), હળદર, લાલ મરચું અને મીઠું નાખી ઘટ્ટ ખીરું તૈયાર કરો. મરચાંને આ ખીરામાં બોળીને ગરમ તેલમાં સોનેરી થાય ત્યાં સુધી તળી લો. આ ગરમાગરમ મરચાં વડા ધાણાની ચટણી કે સોસ સાથે પીરસી શકાય છે.

• લીલા મરચાંની ચટણી

તીખી ચટણી બનાવવા માટે લીલા મરચાં, લીલા ધાણા, લસણ, મીઠું અને લીંબુનો રસ મિક્સરમાં નાખીને પીસી લો. જરૂર મુજબ થોડું પાણી ઉમેરી શકાય. તૈયાર ચટણીને એક બાઉલમાં કાઢી ઉપરથી રાઈ, મીઠા લીમડા અને તેલનો વઘાર કરો. આ ચટણી રોટલી, પરાઠા કે કોઈપણ સ્નેક્સની સાથે ખાવાથી સ્વાદ બમણો થઈ જાય છે.