વેસ્ટર્ન ડિસ્ટર્બન્સને લીધે ભરશિયાળે 32 તાલુકામાં પડ્યો કમોસમી વરસાદ, હવે ઠંડીનું જોર વધશે
અમદાવાદઃ અરબી સમુદ્રમાં ઈસ્ટથી નોર્થ પાકિસ્તાન સુધી 3.1 કિમીની ઈંચાઈએ સર્જાયેલા સાયક્યોનિક સરક્યુલેશનને લીધે વેસ્ટર્ન ડિસ્ટર્બન્સ સર્જાતા ગુજરાતના વાતાવરણમાં પલટો આવતા ભર શિયાળે 32 તાલુકામાં કમોસમી વરસાદના છાંટણા પડ્યા હતા. ગઈકાલ મોડી રાતથી રાજ્યના અનેક વિસ્તારોમાં સામાન્ય વરસાદ વરસ્યો હતો. ખાસ કરીને ઉત્તર ગુજરાતમાં વરસાદી માહોલ જોવા મળ્યો હતો. ત્યારે આજે વહેલી સવારથી અમદાવાદ, વડોદરા સહિત અનેક શહેરોમાં કમોસમી વરસાદ નોંધાયો હતો. રાજ્યમાં વાતાવરણમાં આવેલા પલટાંને કારણે લઘુત્તમ તાપમાનમાં પણ ઘટાડો થતાં ઠંડીમાં વધારો થયો હતો. દરમિયાન રાજ્યના કૃષિ વિભાગના સૂત્રોએ જણાવ્યું હતું કે, હવામાન વિભાગે આગામી તા. 29મીના રોજ છૂટાછવાયા વરસાદની આગાહી કરી હોવાથી પાક બચાવવા ખેડુતોએ જરૂરી ઉપાયો કરવા ભલામણ કરવામાં આવી છે.
ગુજરાતમાં આજે દિવસ દરમિયાન વાદળછાંયું વાતાવરણ રહ્યું હતું. અને 23 તાલુકામાં સામાન્ય વરસાદ નોંધાયો હતો. જ્યારેગઈ રાત્રે અમદાવાદ, પ્રાંતિજ, હિંમતનગર, વિજાપુર સહિત અનેક તાલુકામાં કમોસમી વરસાદ વરસ્યો હતો. આજે સવારે અમદાવાદના પૂર્વ વિસ્તારના નરોડા, નિકોલ, જશોદાનગર સહિતમાં કમોસમી વરસાદ નોંધાયો હતો. જ્યારે વડોદરામાં પણ અનેક વિસ્તારોમાં વરસાદના છાંટા પડ્યા છે. મોર્નિંગ વોકમાં નીકળતા લોકોએ હિલ સ્ટેશન જેવા માહોલનો આનંદ લીધો હતો તેમજ ચાની કીટલીઓ પર લોકોનો જમાવડો પણ જોવા મળ્યો હતો.
રાજકોટના વહેલી સવારે વરસાદી છાંટા પડતા ખેડૂતોમાં ચિંતાફેલાઇ ગઇ હતી, સાથે જ વાતાવરણમાં પણ પલટો આવ્યો હતો. ઠંડો પવન ફૂંકાવાની સાથે આકાશમાં વરસાદી વાદળો ઘેરાઈ ગયા હતા. અને સવારે છ વાગે વરસાદી છાંટા પડ્યા હતા. શિયાળુ પાકને લઈ ખેડૂતોમાં ચિંતાનો વધારો થયો છે. જીરૂ, ચણાને નુકસાન થવાની સંભાવના સેવાઈ રહી છે. ઠંડો પવન ફૂંકાતાં ઠંડીમાં પણ વધારો જોવા મળ્યો હતો. લોકો તાપણું કરી તાપતા નજરે પડ્યા હતા સાઇક્લોનિક સર્ક્યુલેશનની અસરને પગલે અનેક જિલ્લામાં ગઈકાલથી જ વાદળછાયું વાતાવરણ સર્જાયુ હતું. કેટલીક જગ્યાએ તો વાદળો ઘેરાઇ આવ્યાં હતાં અને વરસાદ પડે એવો માહોલ સર્જાયો હતો.
હવામાન વિભાગની આગાહી પ્રમાણે આજે બનાસકાંઠા, સાબરકાંઠા, મહેસાણા, પાટણ, કચ્છમાં હળવોથી મધ્યમ વરસાદ પડી શકે છે. આગામી 48 કલાક દરમિયાન લઘુતમ તાપમાનમાં વધારે ફેરફાર થવાની સંભાવના નથી, પરંતુ બુધવારથી લઘુતમ તાપમાન ત્રણથી ચાર ડીગ્રી સુધીનો ઘટાડો થશે, જેને કારણે ઠંડીનો અનુભવ થશે.
બનાસકાંઠા જિલ્લામાં ચાલુ વર્ષે કમોસમી વરસાદને કારણે ખેડૂતોને નુકસાન વેઠવાનો વારો આવ્યો હતો. ત્યારે ફરીથી હવામાન વિભાગ દ્વારા કમોસમી વરસાદની આગાહી કરવામાં આવતાં ધરતીપુત્રોમાં ચિંતાનાં વાદળો ઘેરાવા લાગ્યાં છે. કમોસમી વરસાદની આગાહીને પગલે ઘઉં, રાયડો, એરંડા, જીરું, ચણા સહિતના રોકડિયા પાકોને નુકસાનની ભીતિ સેવાઇ રહી છે, જેમાં ચાલુ વર્ષે રવીપાકના વાવેતરમાં સૌથી વધુ 1.63 લાખ હેક્ટર જમીનમાં રાયડો, 1.17 લાખ હેકટર જમીનમાં ઘાસચારો, 61 હજાર હેકટર જમીનમાં ઘઉં, 58 હજાર હેક્ટર જમીનમાં બટાકા, 50 હજાર હેકટર જમીનમાં જીરાનું તેમજ 6 હજાર હેકટર જમીનમાં શાકભાજી સહિત અન્ય પાકો મળીને જિલ્લામાં કુલ 4.75 લાખ હેકટરમાં શિયાળુ પાકનું વાવેતર કરવામાં આવ્યું છે.
