અમદાવાદઃ ભારતમાં મહિલાઓ દરેક ક્ષેત્રમાં સફળતા પૂર્વક આગળ વધી રહી છે. ત્યારે હવે મહિલાઓએ પ્રથમવાર ભારતીય રેલવેને ગુડસ ટ્રેન દોડાવીને અનોખી સિદ્ધિ હાંસલ કરી છે. રેલવે પ્રધાન પીયૂષ ગોયલે આ જાણકારી ટ્વિટર માધ્યમથી આપી છે.
પશ્ચિમ રેલવે વિભાગ દ્વારા તાજેતરમાં મહારાષ્ટ્રના પાલઘર જિલ્લાના વસઈથી ગુજરાતના વડોદરા સુધી એક માલગાડી દોડાવવામાં આવી હતી. આ માલગાડીની વિશેષતા એ હતી કે એની કર્મચારીઓ મહિલાઓ હતી. ટ્રેનના એન્જિનની ડ્રાઈવર અને ગાર્ડ, એમ બંને જવાબદારી મહિલા કર્મચારીઓએ સંભાળી હતી.
પશ્ચિમ રેલવેએ ગૂડ્સ ટ્રેન માટે પણ પહેલી જ વાર મહિલા કર્મચારીઓને તૈનાત કરી હતી. આ ગૂડ્સ ટ્રેન ત્રણ મહિલા કર્મચારીઓની ટીમે દોડાવી હતી. કૂમકૂમ ડોંગરે, ઉદિતા વર્મા અને આકાંક્ષા રાય. આ ત્રણેય મહિલાએ સફળતાપૂર્વક અને કુશળતાપૂર્વક એમની આ કામગીરી બજાવી આપી હતી. આ કામગીરી પડકારજનક અને કઠિન પ્રકારની હોય છે. લાંબા અંતર સુધી પ્રવાસ કરવો પડતો હોય છે. એટલે જ બહુ જૂજ મહિલાઓ લોકો પાઈલટ અને ગાર્ડની ફરજ બજાવવા તૈયાર થાય છે.
