નવી દિલ્હીઃ ચંદ્રના દક્ષિણ ધ્રુવ ઉપર ભારતના ચંદ્રયાન-3નું સફળતાપૂર્વક ઉતરાયણ થયું હતું. વડાપ્રધાન નરેન્દ્ર મોદી પણ જોહાનિસબર્ગથી વર્ચ્યુઅલ રીતે જોડાયા હતા. જ્યારે ચંદ્રયાન-3 સફળતાપૂર્વક લેન્ડ થતા પીએમ મોદીએ પણ તિરંગો દર્શાવીને ખુશી વ્યક્ત કરી હતી. જે બાદ વડાપ્રધાન નરેન્દ્ર મોદીએ ચંદ્રયાન-3ની સફળતાને લઈને ભારતીય વૈજ્ઞાનિકો અને દેશની જનતાને અભિનંદન પાઠવ્યાં હતા.
વડાપ્રધાન નરેન્દ્ર મોદીએ કહ્યું હતું કે, “મારા પ્રિય પરિવારના સભ્યો! આવો ઈતિહાસ આપણી નજર સામે બનતો જોઈને આપણને ગર્વ થાય છે. આવી ઐતિહાસિક ઘટનાઓ રાષ્ટ્રજીવનની ચેતના બની રહે છે. આ ક્ષણ અવિસ્મરણીય છે. આ ક્ષણ અભૂતપૂર્વ છે. વિકસિત ભારતના શંખનાદ આ ક્ષણ છે. નવા ભારતની જયઘોષની આ ક્ષણ છે. મુશ્કેલીઓના સાગરને પાર કરવાની આ ક્ષણ છે. વિજયના ચંદ્રમાર્ગ પર ચાલવાની આ ક્ષણ છે. આ ક્ષણ 140 કરોડ ઘડકનોના સામર્થ્યની છે. આ ભારતની નવી ઉર્જા, નવી ચેતનાની ક્ષણ છે. ભારતના ઉગતા ભાગ્યને બોલાવવાની આ ક્ષણ છે. અમરત્વના પ્રથમ પ્રકાશમાં સફળતાનું અમૃત વરસ્યું છે. અમે પૃથ્વી પર પ્રતિજ્ઞા લીધી અને ચંદ્ર પર તેનો સાક્ષાત્કાર કર્યો.
તેમણે કહ્યું, “આજે આપણે અવકાશમાં ન્યુ ઈન્ડિયાની નવી ઉડાન જોઈ છે. દરેક ઘરમાં ઉજવણી શરૂ થઈ ગઈ છે. મારા હૃદયથી, હું આ ઉત્સાહ અને ઉલ્લાસમાં મારા દેશવાસીઓ, મારા પરિવારના સભ્યો સાથે પણ જોડાયેલું છું. હું ચંદ્રયાનની ટીમ, ઈસરો અને દેશના તમામ વૈજ્ઞાનિકોને હૃદયપૂર્વક અભિનંદન આપું છું. જેણે આ ક્ષણ માટે વર્ષોથી ખૂબ મહેનત કરી. આપણા વૈજ્ઞાનિકોની મહેનતને કારણે ભારત દક્ષિણ ધ્રુવ પર પહોંચી ગયું છે, જ્યાં આજ સુધી દુનિયાનો કોઈ દેશ પહોંચી શક્યો નથી. આજથી ચંદ્રને લગતી દંતકથાઓ બદલાશે, વાર્તાઓ પણ બદલાશે અને નવી પેઢી માટે કહેવતો પણ બદલાશે. ભારતમાં આપણે બધા પૃથ્વીને માતા અને ચંદ્રને મામા કહીએ છીએ. એક જમાનામાં એવું કહેવાતું હતું કે ચંદા મામા દૂરથી આવ્યા છે, હવે એક દિવસ એવો પણ આવશે, જ્યારે બાળકો કહેશે કે ચંદા મામા હમણાં જ પ્રવાસેથી આવ્યા છે. ઈસરો આગામી દિવસોમાં સૂર્ય અને શુક્ર ગ્રહને લઈને અભ્યાસ કરશે.
