ISRO એ આદિત્ય L1 ને લઈને આપ્યું મોટું અપડેટ,અવકાશમાં લગાવી પ્રથમ છલાંગ
શ્રીહરિકોટા: શનિવારે ઈસરોના સતીશ ધવન સ્પેસ સેન્ટરથી લોન્ચ કરાયેલા આદિત્ય-L1 મિશન પર ઈસરોએ એક મોટું અપડેટ આપ્યું છે. તેના લોન્ચિંગના એક દિવસ પછી રવિવારે આદિત્ય-L1 એ તેની ભ્રમણકક્ષા બદલી છે અને હવે તે બીજી ભ્રમણકક્ષામાં સ્થિર છે. જારી પ્રક્રિયા અનુસાર તેણે 16 દિવસ સુધી પૃથ્વીની આસપાસ પરિભ્રમણ કરવાનું છે, ત્યારબાદ જ તે સૂર્ય તરફ તેના માર્ગ પર આગળ વધશે. આદિત્ય -L1 16 દિવસમાં પાંચ વખત પૃથ્વીની પરિક્રમા કરશે. ઈસરોના અપડેટ મુજબ 5 સપ્ટેમ્બરે ફરી ભ્રમણકક્ષામાં ફેરફાર થશે.
માહિતી અનુસાર, ISRO એ X (ટ્વીટ) કરીને માહિતી આપી હતી, આદિત્ય-L1 યોગ્ય રીતે કામ કરી રહ્યું છે અને તેની ભ્રમણકક્ષા બદલી છે. ભારત દ્વારા અવકાશમાં મોકલવામાં આવેલ સૌપ્રથમ સૂર્ય મિશન આદિત્ય-L1ની ભ્રમણકક્ષા પરિવર્તનની આગામી પ્રક્રિયા 5 સપ્ટેમ્બર, 2023ના રોજ થવાની છે. આ દરમિયાન ભારતીય સમય અનુસાર લગભગ રાતના 3 વાગ્યા હશે. આદિત્ય એલ-1 235 x 19500 કિમીની ભ્રમણકક્ષા છોડીને 245km x 22459 kmની ભ્રમણકક્ષામાં પહોંચી ગયું છે. આદિત્ય એલ-1ની આ પ્રથમ મોટી સફળતા છે અને તે સૂર્ય તરફ તેનું પ્રથમ પગલું હોવાનું પણ કહેવામાં આવી રહ્યું છે.
આ પહેલા, આદિત્ય-L1 મિશન પર અભિનંદન આપતા રાજ્ય મંત્રી જીતેન્દ્ર સિંહે કહ્યું હતું કે આ ખરેખર ભારત માટે ખુશીની ક્ષણ છે. આપણે પીએમ મોદીનો પણ આભાર માનવો જોઈએ જેમણે ઈસરોના દ્વાર ખોલ્યા. લોન્ચને જોવા માટે ISROમાં 10,000 લોકો હાજર હતા. આ અગાઉ અકલ્પનીય હતું. આ મિશન માટે દેશભરની વિજ્ઞાન સંસ્થાઓએ સહકાર આપ્યો. એકંદરે, આ એક મોટી છલાંગ છે.
ISRO એ એક રોલ મોડલ છે જેનું અન્યોએ અનુકરણ કરવું જોઈએ. બહારના વૈજ્ઞાનિક સમુદાયે ચાતુર્ય બતાવ્યું છે. તેની પ્રશંસા કરતાં તેમણે કહ્યું કે પ્રોજેક્ટ ડાયરેક્ટર નિગાર શાજીએ એકલા હાથે તેમના જીવનના 7-8 વર્ષ સમર્પિત કર્યા અને આ પ્રોજેક્ટ માટે સખત મહેનત કરી. આડકતરી રીતે તેણે પોતાની જાતને આ મિશન માટે સમર્પિત કરી દીધી.
