જમ્મુ-કાશ્મીર:કુલગામમાં સુરક્ષાદળો અને આતંકીઓ વચ્ચે અથડામણ શરુ,જૈશના બે આતંકીઓ ફસાયા હોવાની આશંકા
- સુરક્ષાદળો અને આતંકીઓ વચ્ચે અથડામણ
- જૈશના બે આતંકીઓ ફસાયા હોવાની આશંકા
- જમ્મુ કાશ્મીરના કુલગામની ઘટના
શ્રીનગર:જમ્મુ-કાશ્મીરમાં આતંકવાદીઓ તેમની નાપાક હરકતોથી બચી રહ્યા નથી.અહીં કુલગામ જિલ્લાના દેવસર વિસ્તારના ચેયનમાં આતંકવાદીઓ અને સુરક્ષા દળો વચ્ચે એન્કાઉન્ટર શરૂ થયું છે. સમાચાર એજન્સીના જણાવ્યા અનુસાર,આ સમયે પોલીસ અને સેનાએ આગેવાની લીધી છે.કુલગામ એન્કાઉન્ટરમાં જૈશ-એ-મોહમ્મદના 2 થી 3 આતંકીઓ ફસાયા હોવાની આશંકા છે. કહેવામાં આવી રહ્યું છે કે,આ સમયે સુરક્ષા દળોએ કેટલાક આતંકીઓને ઘેરી લીધા છે અને બંને તરફથી ફાયરિંગ શરુ છે.
આ પહેલા શનિવારે જમ્મુ-કાશ્મીરના શ્રીનગરમાં આતંકવાદીઓએ એક પોલીસકર્મીની ગોળી મારીને હત્યા કરી હતી.એક પોલીસ અધિકારીએ આ માહિતી આપી. તેમણે જણાવ્યું કે,શહેરના જુનીમાર વિસ્તારમાં જન રોડ પર સવારે લગભગ 8.40 વાગ્યે આતંકવાદીઓએ જમ્મુ-કાશ્મીર પોલીસ કોન્સ્ટેબલ ગુલામ હસન પર ગોળીબાર કર્યો હતો.હુમલામાં કોન્સ્ટેબલ ગંભીર રીતે ઘાયલ થયો હતો. અધિકારીએ જણાવ્યું કે હસનને ઈજાગ્રસ્ત હાલતમાં SKIMS હોસ્પિટલમાં દાખલ કરવામાં આવ્યો હતો, જ્યાં સાંજે તેનું મૃત્યુ થયું હતું. તેણે કહ્યું કે હસન મોટરસાઈકલ પર જઈ રહ્યો હતો ત્યારે હુમલો થયો. ઘટના સમયે તેની પાસે હથિયાર નહોતું.
અગાઉ, ગયા અઠવાડિયે, સુરક્ષા દળોએ કુલગામ જિલ્લામાંથી બે હાઈબ્રીડ આતંકવાદીઓની ધરપકડ કરી હતી.આ આતંકીઓમાં એક લશ્કર-એ-તૈયબાનો પણ હતો.પોલીસે જણાવ્યું કે,આતંકવાદી પાસેથી હથિયાર અને દારૂગોળો, પિસ્તોલ, બે ગ્રેનેડ અને 51 પિસ્તોલ કારતૂસ મળી આવ્યા છે.પોલીસના જણાવ્યા અનુસાર આ ઉપરાંત શહેરના નોગામ વિસ્તારમાંથી અન્ય એક ‘હાઈબ્રિડ’ આતંકવાદીની ધરપકડ કરવામાં આવી હતી.
