જન્માષ્ટમીમાં કાન્હાજીના ભોગ માટે બનાવો નારિયેળ પાનના લાડુ, જાણો રેસીપી

રેસીપી, 04 સપ્ટેમ્બર 2026: કોઈપણ તહેવાર કે ખાસ પ્રસંગમાં મીઠાઈનું એક અલગ જ મહત્વ હોય છે. જો તમે ઘરમાં માવો લાવ્યા વગર કે ઓછી મહેનતમાં મોંમાં મુકતા જ ઓગળી જાય તેવી વાનગી બનાવવા માંગતા હોવ, તો નારિયેળ પાન લાડુ એક સુપર હિટ ઓપ્શન છે.

નાગરવેલના પાનની તાજી સુગંધ, નારિયેળનું છીણ અને અંદર ભરેલું મીઠું-ચટાકેદાર ગુલકંદનું સ્ટફિંગ આ લાડુને રોયલ અને રિફ્રેશિંગ ટેસ્ટ આપે છે. મહેમાનોને પીરસવા માટે કે તહેવારમાં કાન્હા-ભોગ માટે આ મીઠાઈ એકદમ પરફેક્ટ છે.

નારિયેળ પાન લાડુ રેસીપી  

સામગ્રી

1 કપ સુકાયેલું નારિયેળ

1 કપ દૂધ

2 તાજા પાન/નાગરના પાન

3/4 કપ દૂધનો પાવડર

1/2 કપ ભૂકો કરેલું પનીર

3 ચમચી ખાંડ

1 ચમચી ઘી

1/2 ચમચી ઈલાયચી પાવડર

જરૂર મુજબ ગુલકંદ

ગુલાબની પાંખડીઓ, ટોપિંગ માટે

નારિયેળ પાન લાડુ બનાવવાની રીત  

સૌ પ્રથમ પાનને થોડું દૂધ સાથે ભેળવી દો. સુકાયેલું નારિયેળ 1 ચમચી ઘીમાં શેકો અને બાજુ પર રાખો. પાન મિક્ષ કરેલ દૂધ, દૂધનો પાવડર, પનીર અને ખાંડ થોડું ઘટ્ટ થાય ત્યાં સુધી કુક કરો.

શેકેલું નારિયેળ અને 1/2 ચમચી ઈલાયચી પાવડર ઉમેરો. સારી રીતે મિક્સ કરો અને 2 મિનિટ સુધી કુક કરો.

ઘી ઉમેરો અને લગભગ 5 મિનિટ સુધી કુક કરો, જ્યાં સુધી મિશ્રણ ઘટ્ટ ન થાય અને તવાની બાજુઓ છોડી ન જાય.

હવે મિશ્રણ ઠંડુ કરો, લાડુનો આકાર આપો, ચપટી કરો અને તમારા અંગૂઠાથી એક ખાંચ બનાવો. સુકા નારિયેળનો કોટ કરો. વચ્ચે ગુલકંદ ભરો અને ગુલાબની પાંખડીઓથી લગાવી ભગવાનને ભોગ ધરો.