બમાકોઃ ઉત્તરી માલી શહેર ટિમ્બક્ટુમાં લશ્કરી છાવણીમાં આતંકવાદીઓએ ઘુસણખોરીનો નિષ્ફળ પ્રયાસ કર્યો હતો. જો કે, જવાનોએ 14 જેટલા આતંકવાદીઓને ઠાર માર્યાં હતા. એક નિવેદનમાં કહેવામાં આવ્યું છે કે ઘૂસણખોરીનો પ્રયાસ સ્થાનિક સમય મુજબ સવારે 10 વાગ્યાની આસપાસ થયો હતો અને “માલી સશસ્ત્ર દળો (FAMA) ના ઝડપી પ્રતિભાવ દ્વારા આતંકવાદીઓને તાત્કાલિક ભગાડવામાં આવ્યા હતા.”
“પ્રારંભિક માહિતી અનુસાર, 14 આતંકવાદીઓ માર્યા ગયા હતા, 31 શંકાસ્પદ આતંકવાદીઓની ધરપકડ કરવામાં આવી હતી અને શસ્ત્રો, વાહનો અને વિવિધ સામગ્રી જપ્ત કરવામાં આવી હતી,” નિવેદનમાં કહેવામાં આવ્યું છે. ડુએન્ઝાના મધ્ય પ્રદેશમાં આવેલા બૌલ્કેસીમાં લશ્કરી થાણા પર ઘાતક હુમલાના એક દિવસ પછી ઘૂસણખોરીનો પ્રયાસ થયો હતો.
અલગ નિવેદનમાં, FAMA એ બૌલ્કેસસી કેમ્પ પરના હુમલાની પુષ્ટિ કરી હતી. 2012 થી, માલી અલગતાવાદી બળવાખોરી, જેહાદી હુમલાઓ અને આંતર-સમુદાય હિંસાને કારણે ઊંડા અને બહુપક્ષીય કટોકટીનો સામનો કરી રહ્યું છે, જેના કારણે હજારો લોકો માર્યા ગયા છે અને લાખો લોકો વિસ્થાપિત થયા છે.
