માત્ર હિન્દી-અંગ્રેજીમાં જ નહીં,આ ભાષાઓમાં પણ આપી શકશો સરકારી નોકરી માટેની પરીક્ષા
દિલ્હી: કેન્દ્રીય મંત્રી જિતેન્દ્ર સિંહે જણાવ્યું હતું કે, કેન્દ્ર સરકારે સ્ટાફ સિલેકશન કમિશન (SSC) દ્વારા સરકારી નોકરીઓ માટે આયોજિત ભરતી પરીક્ષા 15 ભાષાઓમાં આયોજિત કરવાનો નિર્ણય લીધો છે જેથી કરીને દેશનો કોઈ યુવક નોકરીની તકોથી વંચિત ન રહી જાય. તેમણે કર્મચારી, જાહેર ફરિયાદ અને પેન્શન મંત્રાલયની 14મી હિન્દી સલાહકાર સમિતિની બેઠકને સંબોધિત કરતા આ વાત કહી.
કેન્દ્રીય મંત્રીએ કહ્યું કે આ ઐતિહાસિક નિર્ણય સ્થાનિક યુવાનોની ભાગીદારીને પ્રોત્સાહિત કરશે અને પ્રાદેશિક ભાષાઓને પ્રોત્સાહન આપશે. તેમણે કહ્યું કે, ‘તાજેતરમાં 15 ભારતીય ભાષાઓમાં સરકારી નોકરીઓ માટે ભરતી પરીક્ષા લેવાનો નિર્ણય લેવામાં આવ્યો છે જેથી કરીને ભાષાના અવરોધને કારણે દેશનો કોઈ યુવક નોકરીની તકોથી ચૂકી ન જાય.’
તેમણે કહ્યું કે હિન્દી અને અંગ્રેજી સિવાય, પ્રશ્નપત્ર 13 પ્રાદેશિક ભાષાઓ આસામી, બંગાળી, ગુજરાતી, મરાઠી, મલયાલમ, કન્નડ, તમિલ, તેલુગુ, ઉડિયા, ઉર્દૂ, પંજાબી, મણિપુરી અને કોંકણીમાં પણ હશે.
SSC દ્વારા આયોજિત ભરતી પરીક્ષાનો ઉલ્લેખ કરતા તેમણે કહ્યું કે, “છેલ્લા નવ વર્ષોમાં વડાપ્રધાન નરેન્દ્ર મોદીના નેતૃત્વમાં, સત્તાવાર ભાષા હિન્દી સિવાય ભારતીય પ્રાદેશિક ભાષાઓને પ્રોત્સાહન આપવામાં નોંધપાત્ર પ્રગતિ થઈ છે.” તેમણે કહ્યું કે આ નિર્ણયથી લાખો ઉમેદવારો તેમની માતૃભાષા/પ્રાદેશિક ભાષામાં હાજર રહી શકશે.
સિંહે કહ્યું કે અંગ્રેજી અને હિન્દી સિવાય અન્ય ભાષાઓમાં એસએસસી પરીક્ષા લેવા માટે વિવિધ રાજ્યોમાંથી સતત માંગ કરવામાં આવી રહી છે. તેને ધ્યાનમાં રાખીને આ નિર્ણય લેવામાં આવ્યો છે.
તેમણે કહ્યું કે 15 સ્થાનિક ભાષાઓ બાદ કેન્દ્ર સરકાર હવે 22 અનુસૂચિત ભાષાઓમાં પણ લેખિત પરીક્ષા લેવાનું આયોજન કરી રહી છે. NEET, JEE અને UGC પરીક્ષાઓ 12 ભાષાઓમાં લેવામાં આવે છે. તેમણે કહ્યું કે શિક્ષણ મંત્રાલય ભારતીય ભાષાઓમાં વિશેષ પુસ્તકોને પ્રોત્સાહન આપવા માટે કામ કરી રહ્યું છે.
