માલદિવના રાષ્ટ્રપતિ એ PM મોદી સાથે કરી મુલાકાત,બન્ને નેતાઓ વચ્ચે દ્વિપક્ષીય સંબંધો પર ચર્ચા, અનેક કરાર પર થયા હસ્તાક્ષર
- પીએમ મોદી અને માલદીવના રાષ્ટ્ર્પતિ વચ્ચે મુલાકાત
- બન્ને નેતાઓ વચ્ચે અનેક કરાર પર હસ્તાક્ષર
દિલ્હીઃ- માલદીવના રાષ્ટ્રપતિ ભારતની મુલાકાતે આવ્યા છે, માલદીવના રાષ્ટ્રપતિ ઈબ્રાહિમ મોહમ્મદ સોલિહ ચાર દિવસીય ભારતની મુલાકાતે છે. આજે તેઓ દિલ્હીના હૈદરાબાદ હાઉસમાં પીએમ નરેન્દ્ર મોદીને મળ્યા હતા. તેમણે પીએમ મોદી સાથે અનેક કરાર પર હસ્તાક્ષર પણ કર્યા છે,
આ બાબતે વડા પ્રધાન નરેન્દ્ર મોદીએ મંગળવારે જણાવ્યું હતું કે ભારત માલદીવને વધારાની $100 મિલિયનની ક્રેડિટ લાઇન વિસ્તારશે.PM મોદી અને માલદીવના રાષ્ટ્રપતિ ઈબ્રાહિમ મોહમ્મદ સોલિહ વચ્ચે દ્વિપક્ષીય વાટાઘાટો બાદ, ભારત અને માલદીવે ક્ષમતા નિર્માણ, સાયબર સુરક્ષા, આવાસ, આપત્તિ વ્યવસ્થાપન અને ઈન્ફ્રાસ્ટ્રક્ચરમાં સહકારની સુવિધા માટે છ કરાર પર હસ્તાક્ષર કર્યા. સોલિહે પણ તેમના દેશની “આતંકવાદના ખતરાનો સામનો કરવા માટે નિશ્ચિત પ્રતિબદ્ધતા” નો પુનરોચ્ચાર કર્યો હતો.
પીએમ મોદી અને રાષ્ટ્રપતિ સોહિલે સંયુક્ત નિવેદન પણ જારી કર્યું હતું. જેમાં પીએમ મોદીએ કહ્યું કે અમે ગ્રેટર માલેમાં 4000 સોશિયલ હાઉસિંગના નિર્માણના પ્રોજેક્ટની સમીક્ષા કરી અને 2000 સામાજિક આવાસ એકમો માટે વધારાની નાણાકીય સહાય પૂરી પાડીશું.
ઉલ્લેખનીય છે કે સોલિહની ભારતની મુલાકાત ટાપુ રાષ્ટ્રના ભૂતપૂર્વ રાષ્ટ્રપતિ અને વર્તમાન સંસદના સ્પીકર મોહમ્મદ નશીદ સાથેના તેમના રાજકીય અણબનાવ વચ્ચે આવી છે. સોલિહ અને નશીદ બંને માલદીવિયન ડેમોક્રેટિક પાર્ટીના વરિષ્ઠ નેતાઓ છે.ઉલ્લેખનીય છે કે રાષ્ટ્રપતિ સોલિહ પીએમ મોદીના આમંત્રણ પર ભારત આવ્યા છે.
આ સાથે જ માલદીવ હિંદ મહાસાગર ક્ષેત્રમાં ભારતનો મુખ્ય પાડોશી દેશ છે અને ભારતની નેબરહુડ ફર્સ્ટ પોલિસીમાં વિશેષ સ્થાન ધરાવે છે. તાજેતરના વર્ષોમાં, ભાગીદારીમાં સહકારના તમામ ક્ષેત્રોમાં ઝડપી વૃદ્ધિ જોવા મળી છે.ભારત માટે, માલદીવ હંમેશા નજીકનો અને મહત્વપૂર્ણ દરિયાઈ પડોશી રહ્યો છે. રોગચાળા સંબંધિત વિક્ષેપો હોવા છતાં બંને દેશો વચ્ચે બહુપક્ષીય સંબંધો મજબૂત થતા જોવા મળી રહ્યા છે.
