દિલ્હી:વડાપ્રધાન નરેન્દ્ર મોદીએ સંયુક્ત આરબ અમીરાત (UAE) ના રાષ્ટ્રપતિ શેખ મોહમ્મદ બિન ઝાયેદ અલ નાહયાનને પત્ર લખીને બંને દેશો વચ્ચેના વ્યૂહાત્મક સંબંધોને વધુ મજબૂત બનાવવા અને સામાન્ય હિતોની સેવા કરવા માટે તેમને વિકસાવવાની શક્યતાઓ શોધવાની જરૂરિયાત પર ભાર મૂક્યો છે.UAEના સત્તાવાર મીડિયા અનુસાર, વડાપ્રધાન મોદીનો પત્ર વિદેશ મંત્રી એસ જયશંકર દ્વારા UAEના રાષ્ટ્રપતિને સોંપવામાં આવ્યો હતો,જ્યારે તેઓ શુક્રવારે ખાડી દેશની મુલાકાત દરમિયાન દુબઈમાં તેમને મળ્યા હતા. જયશંકર આ અઠવાડિયે UAE-ભારત સંયુક્ત સમિતિના 14મા સત્રની બેઠકો અને UAE-ભારત વ્યૂહાત્મક સંવાદના ત્રીજા સત્રમાં ભાગ લેવા માટે UAEમાં હતા.
UAEની સત્તાવાર સમાચાર એજન્સી ‘WAM’એ કહ્યું કે,આ પત્ર બંને દેશો વચ્ચેના વ્યૂહાત્મક સંબંધોને મજબૂત કરવા અને સામાન્ય હિતોને પૂરા કરવા માટે તેમને વિકસાવવાની શક્યતાઓ શોધવા સાથે સંબંધિત છે. WAM અનુસાર, બેઠક દરમિયાન, બંને પક્ષોએ દ્વિપક્ષીય સંબંધોના વિવિધ પાસાઓ અને વ્યાપક વ્યૂહાત્મક ભાગીદારી અને UAE-ભારત વ્યાપક આર્થિક ભાગીદારી કરાર (CEPA) ના માળખામાં પરસ્પર સંબંધોને આગળ વધારવા માટે સહકારના મહત્વ પર ચર્ચા કરી.
આ ઉપરાંત તેઓએ પરસ્પર ચિંતાના ઘણા ક્ષેત્રીય અને આંતરરાષ્ટ્રીય મુદ્દાઓ પર પણ ચર્ચા કરી. જયશંકરે શુક્રવારે એક ટ્વિટમાં કહ્યું, “મારી આતિથ્ય સત્કાર માટે રાષ્ટ્રપતિ શેખ મોહમ્મદ બિન ઝાયેદ અલ નાહયાનનો આભાર.રાષ્ટ્રપતિને વડાપ્રધાન નરેન્દ્ર મોદીના અંગત અભિવાદન અને ઉષ્માભર્યા શુભેચ્છાઓથી માહિતગાર કરવામાં આવ્યા હતા.અમારી વ્યાપક વ્યૂહાત્મક ભાગીદારીને વધુ ઊંચાઈએ લઈ જવા માટે અમે તેમના માર્ગદર્શનની ખૂબ જ કદર કરીએ છીએ.”
