રાષ્ટ્રપતિ મુર્મુ સુરીનામના સમકક્ષને મળ્યા,દ્વિપક્ષીય ભાગીદારીને ગાઢ બનાવવાની કરી ચર્ચા
દિલ્હી : રાષ્ટ્રપતિ દ્રૌપદી મુર્મુ સોમવારે તેમના સુરીનામ સમકક્ષ ચંદ્રિકાપ્રસાદ સંતોખીને મળ્યા હતા અને તેઓએ સંરક્ષણ, કૃષિ, માહિતી-ટેકનોલોજી અને ક્ષમતા નિર્માણ સહિતના અનેક ક્ષેત્રોમાં દ્વિપક્ષીય સહયોગને વધુ ગાઢ બનાવવાની રીતો પર ચર્ચા કરી હતી. આ દરમિયાન, બંને પક્ષોએ આરોગ્ય અને કૃષિ સહિત વિવિધ ક્ષેત્રોમાં ચાર એમઓયુ પર હસ્તાક્ષર કર્યા.
ગયા વર્ષે જુલાઈમાં કાર્યભાર સંભાળ્યા બાદ તેમની પ્રથમ ત્રણ દિવસીય રાજ્ય મુલાકાતે રવિવારે સુરીનામ પહોંચેલા મુર્મુનું અહીંના રાષ્ટ્રપતિ ભવનમાં ઉષ્માભર્યું સ્વાગત કરવામાં આવ્યું હતું. રાષ્ટ્રપતિ મુર્મુએ સંતોખી સાથે પ્રતિનિધિમંડળ સ્તરની વાતચીત કરી. રાષ્ટ્રપતિ મુર્મુના કાર્યાલયે જણાવ્યું હતું કે, “બંને રાષ્ટ્રપતિઓએ ભારત-સુરીનામ સંબંધોને વધુ ગાઢ બનાવવાની રીતો પર ચર્ચા કરી હતી અને સંરક્ષણ, કૃષિ, IT અને ક્ષમતા નિર્માણ સહિત અનેક ક્ષેત્રો પર વ્યાપક ચર્ચા કરી હતી.”
રાષ્ટ્રપતિ કાર્યાલયે ટ્વિટ કર્યું, “રાષ્ટ્રપતિ દ્રૌપદી મુર્મુને આ પ્રસંગે સુરીનામમાં ભારતીયોના આગમનની 150મી વર્ષગાંઠ નિમિત્તે પોસ્ટેજ સ્ટેમ્પનું વિશેષ કવર આપવામાં આવ્યું હતું,” રાષ્ટ્રપતિ મુર્મુ અને રાષ્ટ્રપતિ સંતોખીએ પણ એક કાર્યક્રમમાં હાજરી આપી હતી, જે દક્ષિણ અમેરિકન રાષ્ટ્રમાં ભારતીયોના પ્રથમ જૂથના આગમનના આધારે હતું.
નોંધનીય છે કે 452 ભારતીય મજૂરોને લઈને પહેલું જહાજ 5 જૂન, 1873ના રોજ સુરીનામની રાજધાની પરમારિબો પહોંચ્યું હતું. આ જહાજમાં સવાર મોટાભાગના મજૂરો પૂર્વ ઉત્તર પ્રદેશ અને બિહારના હતા. રાષ્ટ્રપતિ મુર્મુના કાર્યાલયે જણાવ્યું હતું કે, “રાષ્ટ્રપતિ મુર્મુએ ‘બાબા’ અને ‘માઈ’ સ્મારક પર શ્રદ્ધાંજલિ અર્પણ કરી હતી, જે સુરીનામમાં પગ મૂકનાર પ્રથમ ભારતીય પુરુષ અને સ્ત્રીને દર્શાવે છે.”
અગાઉ, વિદેશ મંત્રાલયના પ્રવક્તા અરિંદમ બાગચીએ ટ્વીટ કર્યું હતું કે, “ભારત-સુરીનામ બહુપક્ષીય સહયોગને નવેસરથી પ્રોત્સાહન આપવા માટે, રાષ્ટ્રપતિ દ્રૌપદી મુર્મુ અને રાષ્ટ્રપતિ સંતોખીએ ભારત-સૂરીનામની ભાગીદારીને વધુ ગાઢ બનાવવાની રીતો પર ચર્ચા કરી.” તેમણે કહ્યું, “બંને નેતાઓએ સંરક્ષણ, કૃષિ, આઈટી અને ક્ષમતા નિર્માણ સહિત દ્વિપક્ષીય સહયોગના અનેક ક્ષેત્રોમાં પ્રતિનિધિમંડળ સ્તરની વાતચીત કરી હતી.”
