ગાંધીનગરઃ ગુજરાતમાં ઘણીબધી ખાનગી અને અન્ય બોર્ડ સંલગ્ન શાળાઓમાં ગુજરાતી ભાષાનો એક વિષય પણ ભણાવાતો ન હોવાની ફરિયાદો ઉઠ્યા બાદ સરકારે સુચના આપી હતી. છતાં તેનો અમલ ન કરાતા સરકારે ફરીવાર કડક સુચના આપી છે. હવે શાળાઓમાં ગુજરાતી વિષય ભણાવવામાં નહીં આવે તો સરકાર દ્વારા કડક પગલા ભરવાના નિર્દેશો આપવામાં આવ્યા છે.
સૂત્રોના જણાવ્યા મુજબ રાજ્ય સરકારે અગાઉ સુચના આપી હોવા છતાં ગુજરાતમાં ગુજરાતી ભાષા ભણાવાતી ન હોવાની જાણ થતાં સરકાર પણ બગડી છે. રાજ્ય સરકારે આકરાં પગલાં લેવાના નિર્ણયો લીધા છે. રાજ્ય સરકારે હાઇકોર્ટનું આકરૂં વલણ જોઈને આ નિર્ણય લીધો છે. ગુજરાતના સાહિત્યકારોએ સરકારને રજૂઆત કરી હતી કે, ગુજરાતની શાળાઓ જ રાજ્યમાં ગુજરાતી ભણાવતી નથી. આ મામલો છેક કોર્ટ સુધી પહોંચ્યો હતો. જેમાં સરકારે ખુલાસા કરવા પડ્યા હતા. આ કેસમાં હવે સરકાર બગડી છે. પ્રવક્તા મંત્રીએ જાહેરમાં કહ્યું હતું કે સરકારના આદેશ છતાં કેટલીક ખાનગી સ્કૂલો બાળકોને ગુજરાતી ભણાવતી નથી. આવી ફરિયાદો સરકાર સુધી આવી છે. જો આ બાબતને અવગણવામાં આવશે તો સરકાર કડક પગલાં ભરશે.
સૂત્રોએ વધુમાં જણાવ્યું હતું કે, ગુજરાતમાં પ્રાથમિક સ્કૂલમાં ગુજરાતી ભાષા ફરજિયાત ભણાવવા અંગે જાહેર હિતની અરજી થઇ હતી, જેના આધારે ગુજરાત હાઇકોર્ટે કેન્દ્ર સરકારને નોટીસ ફટકારી હતી. આ અરજીમાં એવો આરોપ હતો કે કેન્દ્રીય વિદ્યાલયોમાં ગુજરાતી ભાષા ભણાવવામાં આવતી નથી. ગુજરાતી નહીં ભણાવતી સ્કૂલો સામે કેવા પ્રકારના પગલાં લેવામાં આવી રહ્યાં છે તેવો સવાલ હાઇકોર્ટે કર્યો હતો, જેના જવાબમાં સરકાર વતી કહેવાયું હતું કે, જે સ્કૂલો ગુજરાતી નહીં ભણાવે તેના સંચાલકોને નોટીસ આપી પગલાં લેવાશે. વિશ્વ માતૃભાષા દિનની ઉજવણીની જાહેરાત સમયે પૂછવામાં આવેલા સવાલના જવાબમાં સરકારના પ્રવક્તા મંત્રીએ પગલાં લેવાનો ખુલાસો કર્યો હતો. ગુજરાતની સ્કૂલોમાં માતૃભાષા ન ભણાવાનો વિવાદ હવે વેગ પકડી રહ્યો છે. આ મામલે સરકારને પણ ખુલાસા કરવા પડી રહ્યાં છે. બાળકોને ગુજરાતી ન ભણાવી પોતાને સુપર સ્કૂલો ગણાવતી ખાનગી શાળાઓ પર આગામી સમયમાં તવાઈ આવી શકે છે.
