નવી દિલ્હી, 16 ઓક્ટોબર 2026: કોકરોચ જનતા પાર્ટી દ્વારા પ્રસ્તાવિત ‘તિરંગા વિરોધ પ્રદર્શન’ને પગલે દિલ્હીના કોણૉટ પ્લેસ વિસ્તારને બંધ કરવાના મામલે સુપ્રીમ કોર્ટે મહત્વની ટકોર કરી છે. કોર્ટે સ્પષ્ટ કર્યું છે કે જો આ પ્રતિબંધોના કારણે વેપારને કોઈ ગેરકાયદેસર નુકસાન થશે, તો કોર્ટ પોતાની સત્તાઓનો ઉપયોગ કરીને યોગ્ય પગલાં લેશે. આ મામલાની આગામી સુનાવણી હવે દશેરાની રજાઓ બાદ 26 અથવા 27 ઓક્ટોબરે હાથ ધરવામાં આવશે.
મુખ્ય ન્યાયાધીશ સૂર્ય કાંત અને ન્યાયાધીશ જોયમાલ્ય બાગચીની બેન્ચે જણાવ્યું હતું કે જો નવી દિલ્હી મ્યુનિસિપલ કાઉન્સિલ દ્વારા લાદવામાં આવેલી પાબંદીઓ જરૂરિયાત કરતાં વધુ કે અનુચિત જણાશે, તો કોર્ટ વળતરના નિર્ધારિત સિદ્ધાંતો અનુસાર કાર્યવાહી કરશે. અદાલતમાં વકીલ જય અનંત દેહાદરાઈએ દિલ્હી કિરાના કમિટી અને દિલ્હી આયર્ન એન્ડ હાર્ડવેર મર્ચન્ટ એસોસિએશનની અરજી રજૂ કરતા જણાવ્યું હતું કે સેન્ટ્રલ પાર્ક બંધ રહેવાથી રોજ ૨૦૦ કરોડ રૂપિયાનો વેપાર પ્રભાવિત થશે. નવી દિલ્હી મ્યુનિસિપલ કાઉન્સિલ દ્વારા ગુરુવારે રાત્રે આ અંગેનો નોટિસ જારી કરીને વિસ્તાર બંધ કરવાનો આદેશ અપાયો હતો.
સુનાવણી દરમિયાન કોર્ટે તહેવારોની સિઝનમાં નાના વેપારીઓ અને દુકાનદારોની મુશ્કેલીઓ પર ખાસ ચિંતા વ્યક્ત કરી હતી. મુખ્ય ન્યાયાધીશ સૂર્ય કાંતે કહ્યું હતું કે, “અમને આશા છે કે તમામ લોકો સમજદારીથી કામ લેશે. આપણે સમજીએ છીએ કે નાના વેપારીઓ આ જ દિવસોમાં પોતાની રોજી-રોટી કમાતા હોય છે અને તેનાથી અનેક પરિવારોની આજીવિકા પર અસર પડે છે.”
જસ્ટિસ બાગચીએ ટિપ્પણી કરી હતી કે વિરોધ પ્રદર્શનનો અધિકાર, વેપાર અને કાયદો-વ્યવસ્થા ત્રણેય બાબતો એકબીજા સાથે જોડાયેલી છે. જો તપાસમાં નવી દિલ્હી મ્યુનિસિપલ કાઉન્સિલનો આદેશ જરૂરિયાત કરતાં વધુ કડક જણાશે, તો કોર્ટ પાસે પબ્લિક લૉ (જાહેર કાયદા) અને કોન્સ્ટીટ્યુશનલ ટોર્ટના અધિકારક્ષેત્ર હેઠળ વળતર આપવાની અને કાર્યવાહી કરવાની સંપૂર્ણ સત્તા રહેલી છે.
