દેશના 4001 ધારાસભ્યોની સંપત્તિ ત્રણ રાજ્યના બજેટ કરતા વધારે, રિપોર્ટમાં ખુલાસો
નવી દિલ્હીઃ દેશના વર્તમાન ધારાસભ્યોની સંપત્તિને લઈને એક રિપોર્ટ જાહેર થયો છે. આ રિપોર્ટ અનુસાર, 4001 વર્તમાન ધારાસભ્યોની કુલ સંપત્તિ 54,545 કરોડ રૂપિયા છે, જે નાગાલેન્ડ, મિઝોરમ અને સિક્કિમના 2023-24ના સંયુક્ત વાર્ષિક બજેટ કરતાં વધુ છે. ભાજપના 1356 ધારાસભ્યો પાસે 16,234 કરોડ રૂપિયાની સંપત્તિ છે, જ્યારે કોંગ્રેસના 719 ધારાસભ્યો પાસે 15,798 કરોડ રૂપિયાની સંપત્તિ છે.
એસોસિએશન ફોર ડેમોક્રેટિક રિફોર્મ્સ (એડીઆર) અને નેશનલ ઈલેક્શન વોચે ધારાસભ્યોએ તેમની છેલ્લી ચૂંટણી લડતા પહેલા દાખલ કરેલા સોગંદનામામાંથી ડેટા મેળવીને તેમની સંપત્તિને લઈને રિપોર્ટ જાહેર કર્યો છે. રિપોર્ટમાં કહેવામાં આવ્યું છે કે, કુલ 4033 ધારાસભ્યોમાંથી 4001 એફિડેવિટનું વિશ્લેષણ કરવામાં આવ્યું છે.
રિપોર્ટ અનુસાર, 4001 વર્તમાન ધારાસભ્યોની કુલ સંપત્તિ 54,545 કરોડ રૂપિયા છે. આ રકમ ત્રણ રાજ્યો નાગાલેન્ડ, મિઝોરમ અને સિક્કિમના 2023-24ના સંયુક્ત વાર્ષિક બજેટ કરતાં વધુ છે, જે કુલ રૂ. 49,103 કરોડ છે. નાગાલેન્ડનું વાર્ષિક બજેટ 2023-24 રૂ. 23,086 કરોડ, મિઝોરમનું રૂ. 14,210 કરોડ અને સિક્કિમનું રૂ. 11,807 કરોડ છે.
ભાજપ અને કોંગ્રેસના ધારાસભ્યો સિવાય YSRCPના 146 ધારાસભ્યો પાસે 3,379 કરોડ રૂપિયાની સંપત્તિ છે. જ્યારે ડીએમકેના 131 ધારાસભ્યો પાસે 1,663 કરોડ રૂપિયાની સંપત્તિ છે. AAPના 161 ધારાસભ્યો પાસે કુલ 1,642 કરોડ રૂપિયાની સંપત્તિ છે. 84 રાજકીય પક્ષો અને અપક્ષ ધારાસભ્યોની પ્રતિ ધારાસભ્ય સરેરાશ સંપત્તિ 13.63 કરોડ રૂપિયા છે.
કર્ણાટકના વિશ્લેષણ કરાયેલા 223 ધારાસભ્યોની કુલ સંપત્તિ 14,359 કરોડ રૂપિયા છે, મહારાષ્ટ્રના વિશ્લેષણ કરાયેલા 284 ધારાસભ્યોની કુલ સંપત્તિ 6,679 કરોડ રૂપિયા છે અને આંધ્ર પ્રદેશના વિશ્લેષણ કરાયેલા 174 ધારાસભ્યોની કુલ સંપત્તિ 4,914 કરોડ રૂપિયા છે. આ રિપોર્ટ 28 રાજ્યોની વિધાનસભાઓ અને બે કેન્દ્રશાસિત પ્રદેશોના 4001 ધારાસભ્યો પર જાહેર કરવામાં આવ્યો છે. તેમાં 84 રાજકીય પક્ષોના બેઠક અને અપક્ષ ધારાસભ્યોની વિગતો પણ છે.
