આ દેશમાં મળે છે દુનિયાની સૌથી મોંઘી વીજળી, એક યુનિટનો ભાવ જાણીને ચોંકી જશો

દુનિયાભરમાં વીજળીના દરો અલગ-અલગ હોય છે. કોઈ દેશમાં વીજળી ખૂબ સસ્તી છે, તો કોઈ દેશમાં સામાન્ય માણસ માટે વીજળીનું બિલ ભરવું પણ મુશ્કેલ બની જાય છે. પરંતુ શું તમે જાણો છો કે વિશ્વમાં એક એવો દેશ પણ છે જ્યાં વીજળીની કિંમત સૌથી વધારે છે? એટલાન્ટિક મહાસાગરમાં આવેલા ટાપુ દેશ ‘બરમુડા’માં દુનિયાની સૌથી મોંઘી વીજળી મળે છે. અહીં લોકોને પ્રતિ કિલોવોટ કલાક (યુનિટ) આશરે 0.46 થી 0.47 અમેરિકન ડોલર એટલે કે ભારતીય ચલણ મુજબ આશરે રૂ. 38 થી રૂ. 40 પ્રતિ યુનિટ ચૂકવવા પડે છે. બરમુડા ઉપરાંત યુરોપના સમૃદ્ધ દેશો જેવા કે જર્મની, ઈટલી અને આયર્લેન્ડ પણ વિશ્વમાં સૌથી મોંઘી વીજળી ધરાવતા દેશોની યાદીમાં મોખરે છે.

• બરમુડામાં આટલી મોંઘી વીજળી હોવાનું મુખ્ય કારણ શું?

આયાતી ઈંધણ પર સંપૂર્ણ નિર્ભરતા: બરમુડામાં વીજળી મોંઘી હોવાનું સૌથી મોટું કારણ તેની વિદેશથી આયાત થતા અશ્મિભૂત ઈંધણ પરની નિર્ભરતા છે. એક નાનો ટાપુ દેશ હોવાને કારણે બરમુડા પાસે ઉર્જાના પોતાના કોઈ મોટા ઘરેલું સ્ત્રોત નથી. અહીં મોટે ભાગે ડીઝલ અને તેલની આયાત કરીને વીજળી પેદા કરવામાં આવે છે. આથી, વૈશ્વિક બજારમાં જ્યારે પણ તેલના ભાવ વધે છે, ત્યારે તેની સીધી અસર ગ્રાહકોના ખિસ્સા પર પડે છે.

ભારે ટેક્સ અને ગ્રીન એનર્જી ચાર્જ: જર્મની જેવા વિકસિત દેશોમાં વીજળીના બિલ માત્ર વીજ ઉત્પાદનના આધારે નક્કી નથી થતા, પરંતુ તેમાં સરકાર દ્વારા વસૂલવામાં આવતો ભારે ટેક્સ અને પર્યાવરણ સંબંધિત શુલ્ક (ગ્રીન ચાર્જ) પણ સામેલ હોય છે. આ ‘રિન્યુએબલ એનર્જી સરચાર્જ’ નો ઉપયોગ સ્વચ્છ ઉર્જા તરફ આગળ વધવા માટે થાય છે અને આ ખર્ચનો મોટો હિસ્સો ગ્રાહકો પાસેથી વીજ દર વધારીને વસૂલવામાં આવે છે.

પાવર ગ્રીડની જાળવણીનો જંગી ખર્ચ: ઈટલી અને આયર્લેન્ડ જેવા દેશોમાં વીજળી મોંઘી થવા પાછળ પાવર ઈન્ફ્રાસ્ટ્રક્ચરની જાળવણી અને તેને અપગ્રેડ કરવાનો જંગી ખર્ચ જવાબદાર છે. વીજળીના ગ્રીડ મજબૂત કરવા, અંતરિયાળ વિસ્તારોમાં વસતી વસ્તી સુધી વીજળી પહોંચાડવી અને ડેટા સેન્ટર્સની વધતી જતી ઉર્જા જરૂરિયાતોને પૂરી કરવા માટે મોટા રોકાણની જરૂર પડે છે, જે અંતે ગ્રાહકોના બિલમાં ઉમેરાય છે.

નાનું બજાર અને ઓછી વસ્તી: ઓછી વસ્તી ધરાવતા ટાપુ દેશોમાં પાવર પ્લાન્ટ અને ટ્રાન્સમિશન નેટવર્ક સ્થાપવાનો ખર્ચ વહેંચવા માટે ગ્રાહકોની સંખ્યા ખૂબ મર્યાદિત હોય છે. આ જ કારણે મોટી વસ્તી અને વિશાળ પાવર નેટવર્ક ધરાવતા દેશોની સરખામણીએ આવા નાના દેશોમાં ઘરદીઠ ઈન્ફ્રાસ્ટ્રક્ચરનો ખર્ચ નોંધપાત્ર રીતે વધી જાય છે.