દિલ્હી સહિત આ 15 રાજ્યો ગાઢ ધુમ્મસમાં લપેટાયા,IMDએ જણાવ્યું કે આગામી 24 કલાકમાં કેવું રહેશે હવામાન
દિલ્હી:રાજધાની દિલ્હી, હરિયાણા, પંજાબ સહિત ઉત્તર ભારતના ઘણા રાજ્યો હજુ પણ ગાઢ ધુમ્મસની લપેટમાં છે. હવામાન વિભાગે જણાવ્યું હતું કે હરિયાણા, પંજાબ, દિલ્હી, રાજસ્થાન, મધ્યપ્રદેશ અને ઉત્તર પ્રદેશના વિવિધ ભાગો મંગળવારે સવારે ખૂબ જ ગાઢ ધુમ્મસની ચાદરથી ઢંકાઈ ગયા હતા. ઘણી જગ્યાએ વિઝિબિલિટી 0-50 મીટર સુધી નોંધાઈ રહી છે. જમ્મુ-કાશ્મીર, લદ્દાખ અને મેઘાલયમાં વિવિધ વિસ્તારોમાં વિઝિબિલિટી 50-200 મીટર સુધી પહોંચી રહી છે. આ તમામ રાજ્યોમાં 28 ડિસેમ્બર સુધી ગાઢ ધુમ્મસ ચાલુ રહેવાની શક્યતા છે.
હવામાન વિભાગે જણાવ્યું કે ઓડિશામાં આજે સવારે પણ ગાઢ ધુમ્મસ જોવા મળી રહ્યું છે. બુધવારે પણ અહીં ધુમ્મસ રહેશે. આ સાથે જ ઉત્તરાખંડના ઘણા વિસ્તારોમાં ગાઢ ધુમ્મસ પણ જોવા મળી રહ્યું છે. મેઘાલય, આસામ, નાગાલેન્ડ, મિઝોરમ અને ત્રિપુરામાં પણ 30 ડિસેમ્બર સુધી ગાઢ ધુમ્મસથી રાહત મળવાની અપેક્ષા નથી. હવામાન વિભાગના જણાવ્યા અનુસાર, ઉત્તર-પશ્ચિમ અને અડીને આવેલા મધ્ય ભારતમાં આગામી 3-4 દિવસ સુધી ગાઢથી ખૂબ ગાઢ ધુમ્મસ ચાલુ રહેવાની શક્યતા છે.
હવામાન વિભાગે કહ્યું કે તમિલનાડુમાં 30 ડિસેમ્બરથી 1 જાન્યુઆરી, 2024 સુધી હળવાથી મધ્યમ વરસાદ થઈ શકે છે. આ સાથે 30 ડિસેમ્બરે ઉત્તર-પશ્ચિમ અને તેની આસપાસના મધ્ય ભારતમાં હળવા વરસાદની સંભાવના છે.
દિલ્હી, નોઈડા સહિત સમગ્ર NCRમાં આજે સવારે ગાઢ ધુમ્મસ જોવા મળી રહ્યું છે. હવામાનશાસ્ત્રીઓએ મંગળવારે આંશિક વાદળછાયું આકાશ અને સવારે ગાઢ ધુમ્મસની આગાહી કરી છે. મહત્તમ અને લઘુત્તમ તાપમાન અનુક્રમે 24 અને સાત ડિગ્રી સેલ્સિયસની આસપાસ રહી શકે છે.સોમવારે દિલ્હીમાં મહત્તમ તાપમાન 23.6 ડિગ્રી સેલ્સિયસ નોંધાયું હતું, જે આ સિઝનની સરેરાશ કરતાં ત્રણ ડિગ્રી વધારે છે. હવાની ગુણવત્તામાં થોડો સુધારો થયો હતો અને તે “ખૂબ જ ખરાબ” શ્રેણીમાં નોંધવામાં આવી હતી. રાષ્ટ્રીય રાજધાનીમાં લઘુત્તમ તાપમાન 7.8 ડિગ્રી સેલ્સિયસ નોંધાયું હતું, જે વર્ષના આ સમય માટે સામાન્ય છે.
