ટ્રમ્પે કમલા હેરિસ પર કરી વંશીય ટિપ્પણી, કહ્યું અશ્વેત છે કે પછી રાજકીય સુવિધા માટે કરી રહી છે ઉપયોગ

અમેરિકાના પૂર્વ રાષ્ટ્રપતિ ડોનાલ્ડ ટ્રમ્પે કમલા હેરિસની વંશીય ઓળખ પર સવાલ ઉઠાવ્યા છે. બુધવારે એક ઇન્ટરવ્યુ દરમિયાન ટ્રમ્પે પ્રશ્ન કર્યો હતો કે શું કમલા હેરિસ વાસ્તવમાં અશ્વેત છે કે પછી તે તેનો રાજકીય સગવડ તરીકે ઉપયોગ કરી રહી છે.

અમેરિકી રાષ્ટ્રપતિની ચૂંટણી માટે ચાલી રહેલી સ્પર્ધા વચ્ચે આ નિવેદને સૌને ચોંકાવી દીધા છે. “તે હંમેશા ભારતીય વારસાની હતી અને માત્ર ભારતીય વારસાને પ્રોત્સાહન આપતી હતી. થોડા વર્ષો પહેલા સુધી મને તે વાતની ખબર નહોતી કે તે અશ્વેત છે, પરંતુ બાદમાં તે અશ્વેત થઇ ગઇ.

ટ્રમ્પે કહ્યું, “હું આમાંથી કોઈ એકનું સન્માન કરું છું, પરંતુ દેખીતી રીતે તે નથી કરતી કારણ કે તે સંપૂર્ણપણે ભારતીય હતી અને પછી અચાનક તેણે વળાંક લીધો..”

વ્હાઇટ હાઉસના પ્રેસ સેક્રેટરી કરીન જીન-પિયરે પત્રકારોને જણાવ્યું હતું કે, “કોઈને એ કહેવાનો અધિકાર નથી કે તેઓ કોણ છે, તેમની ઓળખ કેવી રીતે થાય છે તે આ પદ સંભાળનાર પ્રથમ અશ્વેત મહિલા છે.”