નવરાત્રીના બીજા દિવસે કેવી રીતે કરવી દેવી બ્રહ્મચારિણીની પૂજા,જાણો પૂજા વિધિ અને મહત્વ

દર વર્ષે શારદીય નવરાત્રી અશ્વિન માસની શુક્લ પક્ષની પ્રતિપદા તિથિથી નવમી સુધી ઉજવવામાં આવે છે. આ વર્ષે શારદીય નવરાત્રી 15મી ઓક્ટોબરથી 23મી ઓક્ટોબર સુધી છે. નવરાત્રીના બીજા દિવસે મા દુર્ગાના બીજા સ્વરૂપ મા બ્રહ્મચારિણીની પૂજા કરવામાં આવે છે. આ ઉપરાંત વિશેષ કાર્યમાં સફળતા મેળવવા માટે પણ વ્રત રાખવામાં આવે છે.

ધાર્મિક માન્યતા છે કે ,દેવી માતાની પૂજા કરવાથી સાધકની તમામ મનોકામનાઓ પૂર્ણ થાય છે. તેનાથી ઘરમાં સુખ અને સમૃદ્ધિ પણ આવે છે. તેથી ભક્તો નવરાત્રીના બીજા દિવસે વિધિ-વિધાન પ્રમાણે મા બ્રહ્મચારિણીની પૂજા કરે છે.તો ચાલો જાણીએ મા બ્રહ્મચારિણીની પૂજાની વિધિ, મંત્ર જાપ અને પવિત્ર કથા વિશે.

માતા બ્રહ્મચારિણીની કથા 

નવરાત્રિ દરમિયાન દેવી દુર્ગાના બીજા સ્વરૂપ માતા બ્રહ્મચારિણીની પૂજા કરવામાં આવે છે. એવું માનવામાં આવે છે કે પૂર્વજન્મમાં માતા બ્રહ્મચારિણીએ હિમાલયના ઘરે પુત્રી તરીકે જન્મ લીધો હતો અને ભગવાન શિવને પતિના રૂપમાં મેળવવા માટે તેમણે દેવર્ષિ નારદજીની સલાહ પર કઠોર તપસ્યા કરી હતી. જેના કારણે માતાનું નામ બ્રહ્મચારિણી અથવા તપશ્ચારિણી પડ્યું. એવું માનવામાં આવે છે કે ભગવાન શિવને પતિના રૂપમાં મેળવવા માટે માતાએ ઘણા વર્ષો સુધી ફળ અને ફૂલ ખાઈને કઠોર તપસ્યા કરી હતી.

બ્રહ્મચારિણી માતાની પૂજા કરવાની રીત

નવરાત્રિના બીજા દિવસે સૂર્યોદય પહેલા જાગીને સ્નાન અને ધ્યાન કર્યા પછી મા બ્રહ્મચારિણીના ફોટાને પાટલા પર મૂકીને ગંગાજળનો છંટકાવ કરીને સ્નાન કરો અને પછી દેવીને વસ્ત્ર, ફૂલ, ફળ વગેરે અર્પણ કરો. આજે દેવીની પૂજામાં ખાસ કરીને સિંદૂર અને લાલ ફૂલ ચઢાવો. એવું માનવામાં આવે છે કે નવરાત્રિના બીજા દિવસે જો કોઈ વ્યક્તિ દેવી બ્રહ્મચારિણીની પૂજા કરતી વખતે કેસરની ખીર,હલવો અથવા ખાંડ ચઢાવે છે, તો વ્યક્તિને દેવીના આશીર્વાદ મળે છે અને સાધકને દરેક પ્રકારના સુખની પ્રાપ્તિ થાય છે.

મા બ્રહ્મચારિણીની ઉપાસના માટે જ્યોતિષીય ઉપાય

જ્યોતિષ શાસ્ત્ર અનુસાર માતા બ્રહ્મચારિણીની પૂજા કરવાથી જન્મકુંડળી સંબંધિત મંગલ દોષ અને તેનાથી થતી તમામ પ્રકારની સમસ્યાઓ દૂર થાય છે. આવી સ્થિતિમાં આજે તમારી કુંડળીમાં મંગળ ગ્રહને બળવાન બનાવીને જમીન, મકાન, શક્તિ વગેરેના આશીર્વાદ મેળવવા માટે મા બ્રહ્મચારિણીનું નિપુણતાથી પૂજન કરો.

મા બ્રહ્મચારિણીની પૂજાનો મંત્ર

નવરાત્રિના બીજા દિવસે દેવી બ્રહ્મચારિણીની પૂજા કરતી વખતે ભક્તિ અને શ્રદ્ધા સાથે ‘ઓમ ઐં હ્રીં ક્લીં બ્રહ્મચારિણ્ય નમઃ’ મંત્રનો જાપ કરવાથી સાધકની તમામ મનોકામનાઓ જલ્દી પૂર્ણ થાય છે.