આલિયા ભટ્ટની ફિલ્મ આલ્ફા વિવાદોમાં: પાકિસ્તાની એક્ટ્રેસની પોસ્ટે સોશિયલ મીડિયા પર છેડ્યો નવો વિવાદ

મુંબઈ, 4 જુલાઈ 2026: ગયા શુક્રવારે સિનેમાઘરોમાં રિલીઝ થયેલી યશરાજ ફિલ્મ્સ બેનરની સ્પાય યુનિવર્સ ફિલ્મ ‘આલ્ફા’ બોક્સ ઓફિસ પર સારી કમાણી કરી રહી છે, પરંતુ તેની વાર્તાને લઈને હવે એક મોટો વિવાદ ઊભો થયો છે. પાકિસ્તાની અભિનેત્રી ઇકરા અઝીઝની એક સોશિયલ મીડિયા પોસ્ટે ઇન્ટરનેટ પર હંગામો મચાવી દીધો છે, જેના કારણે મામલો ભારત વિરુદ્ધ પાકિસ્તાન સુધી પહોંચી ગયો છે. સોશિયલ મીડિયા પર ભારતીય યુઝર્સ દ્વારા હવે આ ફિલ્મનો બહિષ્કાર કરવાની માંગ તેજ થઈ ગઈ છે.

પાકિસ્તાની અભિનેત્રી ઇકરા અઝીઝે પોતાના સોશિયલ મીડિયા એકાઉન્ટ પર ફિલ્મ ‘આલ્ફા’નું એક પોસ્ટર શેર કર્યું છે. આ પોસ્ટરના કેપ્શનમાં તેણે લખ્યું, “મિત્રો, આ મૂવી ચોક્કસ જોવી જોઈએ. આ ‘ધુરંધર’ માટે અમારો જવાબ છે. શુક્રિયા YRF.” ઇકરાની આ પોસ્ટ વાયરલ થતાં જ સોશિયલ મીડિયા પર વિવાદ ફાટી નીકળ્યો છે અને ભારતીય યુઝર્સે ફિલ્મના મેકર્સ તેમજ સ્ટારકાસ્ટ પર નિશાન સાધવાનું શરૂ કર્યું છે.

વાસ્તવમાં, આ વિવાદ ‘ધુરંધર’ અને ‘આલ્ફા’ ફિલ્મની વાર્તાની સરખામણીને કારણે શરૂ થયો છે. ધુરંધર ફિલ્મમાં રણવીર સિંહ એક ભારતીય જાસૂસની ભૂમિકામાં છે, જે પાકિસ્તાન જઈને ભારત વિરુદ્ધ થઈ રહેલા ષડયંત્રોને નાકામ કરે છે. બીજી તરફ ‘આલ્ફા’ ફિલ્મમાં બોબી દેઓલને પાકિસ્તાની એજન્ટ તરીકે દર્શાવવામાં આવ્યા છે, જે ભારતીય સેના સાથે જોડાયેલા છે અને ભારત વિરુદ્ધ જ કાવતરું ઘડે છે. આ જ પ્લોટને કારણે પાકિસ્તાની અભિનેત્રીએ આ ફિલ્મને ‘ધુરંધર’નો જવાબ ગણાવી છે, જેનાથી ભારતીય દર્શકો નારાજ થયા છે અને ફિલ્મ પર પ્રતિબંધ મૂકવાની માંગ કરી રહ્યા છે.

• આલિયા ભટ્ટની એક્ટિંગના વખાણ, બોક્સ ઓફિસ પર મેળવ્યું સારું ઓપનિંગ

વિવાદો વચ્ચે પણ ફિલ્મ બોક્સ ઓફિસ પર મજબૂત પકડ જમાવી રહી છે. ફિલ્મે તેના પહેલા જ દિવસે 9 કરોડ રૂપિયાનું શાનદાર કલેક્શન કર્યું છે. ફિલ્મમાં આલિયા ભટ્ટ, શર્વરી વાઘ, અનિલ કપૂર, બોબી દેઓલ અને દિવ્યેન્દુ ભટ્ટાચાર્ય મુખ્ય ભૂમિકામાં છે, જ્યારે રિતિક રોશન કેમિયો રોલમાં જોવા મળે છે. ફિલ્મ વિવેચકો તરફથી ‘આલ્ફા’ને મિશ્ર પ્રતિસાદ મળ્યો છે, પરંતુ આલિયા ભટ્ટ અને શર્વરીના એક્શન અવતાર તથા એક્ટિંગના ચોતરફ વખાણ થઈ રહ્યા છે. હવે જોવાનું એ રહેશે કે સોશિયલ મીડિયા પર ચાલી રહેલો આ વિવાદ આગામી દિવસોમાં ફિલ્મની કમાણી પર કેવી અસર પાડે છે.