સુરત, 05 માર્ચ 2026: A family travelling in a car was brutally beaten by miscreants શહેરમાં લૂખ્ખાઓનો ત્રાસ વધતો જાય છે. ગઈકાલે શહેરના કતારગામ વિસ્તારમાં બાપાસીતારામ ચોક પાસે આવેલી રૂક્ષ્મણી સોસાયટી નજીકથી કારમાં એક પરિવાર જઈ રહ્યું હતું ત્યારે કેટલાક લૂખ્ખા તત્વોએ કાર પર ગંદા પાણીની કોથળીઓ ફેંકી હતી, આથી પરિવારે કાર ઊભી રાખીને ઠપકો આપતા લૂખ્ખા તત્વો ઉશ્કેરાયા હતા. અને કારની ચાવી કાઢી લઈને કારમાંથી પરિવારને બહાર કાઢીને લાકડીઓ અને હાથમાં પહેરેલા કડાથી હુમલો કર્યો હતો. પરિવારને બચાવવા વચ્ચે પડેલા રાહદારીઓને પણ લૂખ્ખાઓએ ફટકાર્યા હતા, આ હિચકારા હુમલામાં મહિલાઓ સહિત 12 જેટલા લોકોને ઇજા પહોંચી છે. તમામ ઇજાગ્રસ્તોને તાત્કાલિક અસરથી સુરતની સ્મીમેર હોસ્પિટલ ખાતે ખસેડવામાં આવ્યા છે. પોલીસે સીસીટીવીના કૂટેજ મેળવીને આરોપીને પકડવા વધુ તપાસ હાથ ધરી છે.
આ બનાવની વિગત એવી છે કે, ગઈકાલે ધૂળેટીના દિને શહેરના કતારગામ વિસ્તારમાં બાપાસીતારામ ચોક પાસે આવેલી રૂક્ષ્મણી સોસાયટી પાસેથી કારમાં એક પરિવાર પસાર થઈ રહ્યો હતો. તે સમયે રસ્તા પર ઉભેલા કેટલાક લુખ્ખાતત્વોએ ગાડી પર ગંદા પાણીની કોથળીઓ ફેંકી હતી. પરિવારે આ બાબતે વિરોધ કરતા મામલો બિચક્યો હતો. લૂખ્ખા તત્વોએ દાદાગીરી કરી કારની ચાવી કાઢી લીધી હતી અને અભદ્ર ગાળાગાળી શરૂ કરી દીધી હતી. ઝઘડો એટલો ઉગ્ર બન્યો કે લુખ્ખાતત્વોએ ઉશ્કેરાઈ જઈને પરિવાર પર હુમલો કરી દીધો હતો. હુમલાખોરોએ હાથમાં પહેરેલા ભારે કડા અને લાકડાના ફટકાઓ વડે પરિવારના સભ્યોને બેરહેમ રીતે માર માર્યો હતો. આ દરમિયાન બચાવવા વચ્ચે પડેલા અન્ય યુવકો અને મહિલાઓને પણ છોડવામાં આવ્યા નહોતા. કુલ 12 જેટલા મહિલા અને પુરુષોને નાની-મોટી ઇજાઓ પહોંચી છે. તમામ ઇજાગ્રસ્તોને તાત્કાલિક અસરથી સુરતની સ્મીમેર હોસ્પિટલ ખાતે ખસેડવામાં આવ્યા છે.
આ હુમલાની સમગ્ર ઘટના નજીકમાં લાગેલા CCTV કેમેરામાં કેદ થઈ ગઈ છે. ફૂટેજમાં સ્પષ્ટપણે જોઈ શકાય છે કે કઈ રીતે લુખ્ખાતત્વો રસ્તા પર આતંક મચાવી રહ્યા છે અને નિર્દોષ લોકોને નિશાન બનાવી રહ્યા છે. ઘટનાની જાણ થતા જ પોલીસનો કાફલો સ્મીમેર હોસ્પિટલ દોડી ગયો હતો અને ઇજાગ્રસ્તોના નિવેદન નોંધવાની તજવીજ હાથ ધરી હતી. પોલીસે CCTV ફૂટેજ કબજે કર્યા છે અને તેના આધારે હુમલાખોરોની ઓળખ કરી તેમને ઝડપી પાડવા માટે કાર્યવાહી હાથ ધરી છે.