ઓઈલની વધતી કિંમતને પગલે અમેરિકા ચિંતિત, ઈરાની ઓઈલ ઉપરનો પ્રતિબંધ હટાવ્યો
વોશિંગ્ટન, 21 માર્ચ, 2026: વૈશ્વિક બજારમાં કાચા તેલ (ક્રૂડ ઓઈલ)ની સતત વધતી કિંમતોને નિયંત્રિત કરવા માટે અમેરિકાએ એક મહત્વપૂર્ણ અને વ્યૂહાત્મક પગલું ભર્યું છે. ટ્રમ્પ વહીવટીતંત્રે દરિયામાં ફસાયેલા ઈરાની તેલના વેચાણ પર લદાયેલા પ્રતિબંધોને અસ્થાયી રૂપે હટાવવાની જાહેરાત કરી છે. અમેરિકાના નાણામંત્રી સ્કોટ બેસેન્ટે જણાવ્યું હતું કે, આ ટૂંકા ગાળાની છૂટછાટથી અંદાજે ૧૪ કરોડ બેરલ ઈરાની તેલ તાત્કાલિક ધોરણે વૈશ્વિક બજારમાં ઉપલબ્ધ થશે.
નાણામંત્રી બેસેન્ટે સોશિયલ મીડિયા પ્લેટફોર્મ પર સ્પષ્ટતા કરી હતી કે, “આ મંજૂરી માત્ર એ જ તેલ માટે છે જે અત્યારે દરિયામાં ટ્રાન્ઝિટમાં છે. આમાં તેલની નવી ખરીદી કે નવા ઉત્પાદનને મંજૂરી આપવામાં આવી નથી.” તેમણે ઉમેર્યું કે અત્યારે આ પ્રતિબંધિત તેલ ચીન સસ્તા ભાવે સંગ્રહ કરી રહ્યું છે. આ પુરવઠો બજારમાં આવવાથી ઉર્જા સંકટ હળવું થશે અને ઈરાન દ્વારા તેલ પુરવઠા પર જે દબાણ ઊભું કરવામાં આવ્યું છે તેને તોડી શકાશે. અમેરિકા ઈરાનના તેલનો ઉપયોગ તેની જ વિરુદ્ધ કિંમતો ઘટાડવા માટે કરી રહ્યું છે.
યુદ્ધ શરૂ થયા પહેલા બ્રેન્ટ ક્રૂડની કિંમત પ્રતિ બેરલ 70 ડોલરની આસપાસ હતી, જે આ સપ્તાહે વધીને 119.50 ડોલર સુધી પહોંચી ગઈ છે. અમેરિકામાં પણ પેટ્રોલના ભાવ 3 ડોલર પ્રતિ ગેલનથી વધીને 3.99 ડોલર થઈ ગયા છે. આ મોંઘવારીને રોકવા માટે ઈરાની તેલ પરના પ્રતિબંધોમાં 19 એપ્રિલ સુધી ઢીલ આપવામાં આવી છે. જોકે, અમેરિકાએ સ્પષ્ટ કર્યું છે કે ઈરાનને આ વેચાણની આવક મેળવવામાં મુશ્કેલી પડશે અને તેની નાણાકીય સિસ્ટમ પર કડક નજર રાખવામાં આવશે.
બીજી તરફ, રાષ્ટ્રપતિ ડોનાલ્ડ ટ્રમ્પે પણ મહત્વના સંકેત આપ્યા છે. તેમણે ‘ટ્રુથ સોશિયલ’ પર લખ્યું કે, અમે પશ્ચિમ એશિયામાં ઈરાન વિરુદ્ધ ચાલી રહેલા સૈન્ય અભિયાનને ધીમે-ધીમે ઓછું કરવા પર વિચાર કરી રહ્યા છીએ, કારણ કે અમે અમારા ઉદ્દેશ્યો પ્રાપ્ત કરવાની નજીક છીએ. જોકે, વ્હાઇટ હાઉસ ખાતે પત્રકારો સાથેની વાતચીતમાં તેમણે સ્પષ્ટ કર્યું હતું કે, “હું અત્યારે યુદ્ધવિરામ ઈચ્છતો નથી. જ્યારે તમે વિરોધીને સંપૂર્ણપણે પરાસ્ત કરી રહ્યા હોવ, ત્યારે યુદ્ધવિરામનો પ્રશ્ન નથી આવતો. અમે વાતચીત માટે તૈયાર છીએ, પણ નબળા પડીને નહીં.”
