અમદાવાદ: સાયબર ઠગાઈના નાણાં સગેવગે કરવાનું આંતરરાજ્ય નેટવર્ક ઝડપાયું
અમદાવાદ, 21 માર્ચ 2026: શહેરમાં સાયબર ક્રાઈમના વધતા ગ્રાફ વચ્ચે પાલડી પોલીસે એક મોટી સફળતા મેળવતા સાયબર માફિયાઓને બેંક એકાઉન્ટ પૂરા પાડતા એક શખ્સની ધરપકડ કરી છે. પકડાયેલ આરોપી ગોમતીપુરનો રહેવાસી છે અને તેના બેંક ખાતાનો ઉપયોગ દેશના અન્ય ૩ રાજ્યોમાં થયેલી છેતરપિંડીના નાણાં મેળવવા માટે કરવામાં આવ્યો હોવાનું ખુલ્યું છે.
પાલડી પોલીસ સ્ટેશનના સર્વેલન્સ સ્ટાફને મળેલી ચોક્કસ બાતમીના આધારે ગોમતીપુર વિસ્તારમાં દરોડો પાડી સાહિલ અંસારી નામના યુવકની અટકાયત કરવામાં આવી હતી. પ્રાથમિક પૂછપરછમાં સાહિલે કબૂલાત કરી હતી કે તેણે વધુ પૈસા કમાવવાની લાલચમાં પોતાનું અંગત બેંક એકાઉન્ટ સાયબર ગુનેગારોને વાપરવા માટે આપ્યું હતું. આ એકાઉન્ટમાં અત્યાર સુધીમાં અંદાજે 10 લાખ રૂપિયા જેટલી માતબર રકમ ટ્રાન્સફર થઈ હોવાની વિગતો પોલીસ તપાસમાં સપાટી પર આવી છે.
પોલીસ તપાસમાં સૌથી ચોંકાવનારી વિગત એ સામે આવી છે કે સાહિલ અંસારીના જે બેંક એકાઉન્ટનો ઉપયોગ થતો હતો, તેની વિરુદ્ધ માત્ર ગુજરાતમાં જ નહીં પણ દેશના અન્ય ત્રણ રાજ્યોમાં પણ સાયબર ફ્રોડની ફરિયાદો થયેલી છે. આ પરથી પોલીસને શંકા છે કે આ કોઈ નાનું-મોટું કૌભાંડ નહીં પણ આંતરરાજ્ય સાયબર ગેંગનું નેટવર્ક છે, જે નિર્દોષ લોકોના ખાતા મેળવી કરોડો રૂપિયાની હેરાફેરી કરે છે.
આ ગુનામાં સાહિલ તો માત્ર મહોરું હોવાનું બહાર આવ્યું છે. આ સમગ્ર કૌભાંડનો અસલી માસ્ટરમાઈન્ડ તાહા તન્વીર કાદરી હોવાનું પોલીસ માની રહી છે. તાહા જ નક્કી કરતો હતો કે કયા એકાઉન્ટમાં ક્યારે નાણાં ટ્રાન્સફર કરવા અને તેને કેવી રીતે ઉપાડવા. હાલ તાહા કાદરી ફરાર હોવાથી પાલડી પોલીસે તેને ઝડપી પાડવા માટે અલગ-અલગ ટીમો બનાવી તપાસ તેજ કરી છે. દરમિયાન પોલીસે નાગરિકોને અપીલ કરી છે કે, કોઈ પણ અજાણી વ્યક્તિને કમિશનની લાલચમાં પોતાના બેંક એકાઉન્ટ કે KYC દસ્તાવેજો આપવા નહીં, અન્યથા અજાણતા જ તમે ગંભીર ગુનાના ભાગીદાર બની શકો છો.
આ પણ વાંચોઃ ઓઈલની વધતી કિંમતને પગલે અમેરિકા ચિંતિત, ઈરાની ઓઈલ ઉપરનો પ્રતિબંધ હટાવ્યો
