દિલ્હી: રાજધાની દિલ્હી ગેસ ચેમ્બર બની ગઈ છે. હવાની ગુણવત્તા સૂચકાંક 400ને પાર કરી ગયો છે અને તે ખૂબ જ ગંભીર શ્રેણીનું પ્રતિનિધિત્વ કરે છે. આ દરમિયાન દિલ્હીના શિક્ષણ મંત્રી આતિશીએ રવિવારે એક મોટી જાહેરાત કરી છે. આતિશીએ કહ્યું કે રાષ્ટ્રીય રાજધાનીમાં વાયુ પ્રદૂષણના ખતરનાક સ્તરને જોતા સરકારે પ્રાથમિક શાળાઓને 10 નવેમ્બર સુધી બંધ કરવાનો નિર્ણય લીધો છે. આ સમયગાળા દરમિયાન ધોરણ 6 થી 12 સુધીની શાળાઓને ઑનલાઇન વર્ગોમાં શિફ્ટ કરવાનો વિકલ્પ આપવામાં આવ્યો છે. દિલ્હીના સેન્ટ્રલ પોલ્યુશન કંટ્રોલ બોર્ડ અનુસાર, દિલ્હીમાં AQI ગંભીર શ્રેણીમાં છે.દિલ્હીના આયાનગરમાં AQI 464 છે. જ્યારે દ્વારકા સેક્ટર 8માં AQI 486, જહાંગીરપુરીમાં 463 અને IGI એરપોર્ટ T3માં AQI 480 નોંધવામાં આવ્યો છે.
જો દિલ્હીના જુદા જુદા વિસ્તારોની વાત કરીએ તો શાદીપુરમાં સૌથી વધુ પ્રદૂષણ નોંધાયું છે. AQI 492 અહીં નોંધાયું હતું. જ્યારે આરકે પુરમમાં 489 , ઓખલા ફેઝ 2 માં 484, પટપરગંજમાં 464, બવાનામાં 479, મુંડકામાં 474, નજફગઢમાં 472, આયાનગરમાં 464, નરેલામાં 457, DTU માં 423, ITO માં 410,પુસા ID માં 406 AQI નોંધાયો છે. હાલમાં દિલ્હીમાં 40 સ્થળોએ પ્રદૂષણ સ્તર પર નજર રાખવામાં આવી રહી છે. છેલ્લા 4-5 દિવસમાં વાયુ પ્રદૂષણ ગંભીર બન્યું છે.તેના કારણે દિલ્હીમાં વિઝિબિલિટીનું સ્તર ઘટી ગયું છે અને લોકોએ થોડા મીટરથી આગળ જોવાનું બંધ કરી દીધું છે.
શનિવારે દિલ્હીનો AQI 500ને પાર કરી ગયો હતો. શનિવારે IGI T3 એરપોર્ટ અને તેની આસપાસનો AQI 571 નોંધાયો હતો. જ્યારે દિલ્હીના ધીરપુરમાં AQI 542, નોઈડામાં 576, નોઈડા સેક્ટર 116માં 426, નોઈડા સેક્ટર 62માં 428 નોંધાયું હતું. તે જ સમયે, મેદાંતા હોસ્પિટલના એક વરિષ્ઠ ફેફસાના નિષ્ણાતે કહ્યું કે હાલમાં દિલ્હીમાં જે લોકો શ્વાસ લઈ રહ્યા છે તેઓ દરરોજ 20-25 સિગારેટ જેટલી ઝેરી હવા તેમના શરીરમાં લઈ રહ્યા છે.
