બદલાતી ઋતુની સાથે માત્ર ખાણી-પીણી જ નહીં, પણ કપડાં અને ફેશનમાં પણ ફેરફાર કરવો અનિવાર્ય છે. ઘણીવાર લોકો ટ્રેન્ડને ફોલો કરવાના ચક્કરમાં એવા ફેબ્રિક (કાપડ) પસંદ કરી લે છે જે તે ઋતુ માટે અનુકૂળ હોતા નથી, જેના કારણે અસ્વસ્થતા અને ત્વચાની સમસ્યાઓ સર્જાઈ શકે છે. સાચું ફેબ્રિક માત્ર તમને સ્ટાઇલિશ જ નથી બનાવતું, પરંતુ શરીરના તાપમાનને સંતુલિત રાખવામાં પણ મદદ કરે છે. આજે માર્કેટમાં અનેક પ્રકારના ફેબ્રિક ઉપલબ્ધ છે, પરંતુ કઈ ઋતુમાં કયું કાપડ શ્રેષ્ઠ રહેશે? ચાલો જાણીએ નિષ્ણાતોનો મત.
-
ઉનાળા માટે: હળવા અને પરસેવો શોષી લે તેવા ફેબ્રિક
ઉનાળાની કાળઝાળ ગરમીમાં હંમેશા એવા કપડાં પહેરવા જોઈએ જે શરીરમાં હવા ઉજાસ જાળવી રાખે અને ઠંડક આપે. મલમલ અને કોટન ગરમી માટે મલમલ સૌથી શ્રેષ્ઠ વિકલ્પ છે. તે ખૂબ જ હળવું હોય છે. જ્યારે લીનન ફેબ્રિક પરસેવો શોષવામાં મદદરૂપ થાય છે અને ત્વચાને ચીકણી થવા દેતું નથી. ઉનાળામાં હંમેશા પેસ્ટલ કલર્સ પસંદ કરવા જોઈએ, કારણ કે તે ગરમીને શોષતા નથી અને આંખોને ઠંડક આપે છે.
- ચોમાસા માટે: ઝડપથી સુકાય અને ચીપકે નહીં તેવા ફેબ્રિક
વરસાદની ઋતુમાં કપડાં પલળી જવાની શક્યતા વધુ હોય છે, તેથી એવું કાપડ પસંદ કરવું જોઈએ જે જલ્દી સુકાઈ જાય અને પલળ્યા પછી શરીર પર ચીપકે નહીં. જોર્જટ અને ક્રેપ પાણી પડવા છતાં વધુ ભારે થતા નથી અને ખૂબ જ ઝડપથી સુકાઈ જાય છે. ટિશ્યુ સિલ્ક પણ ચોમાસા માટે એક સ્ટાઇલિશ અને કમ્ફર્ટેબલ વિકલ્પ છે. ચોમાસામાં ક્યારેય પ્યોર કોટન કે પ્યોર સિલ્ક ન પહેરવું જોઈએ, કારણ કે તે પલળ્યા પછી સુકાતા વાર લાગે છે અને ભારે થઈ જાય છે.
- શિયાળા માટે: હૂંફ આપે તેવા રોયલ ફેબ્રિક
શિયાળામાં ફેશન માટે સૌથી વધુ સ્કોપ હોય છે. આ ઋતુમાં જાડા અને શરીરની ગરમી જાળવી રાખે તેવા ફેબ્રિક શ્રેષ્ઠ ગણાય છે. બનારસી કાપડ શરીરની ગરમીને પકડી રાખે છે, જેનાથી ઠંડી ઓછી લાગે છે અને લુક પણ રોયલ મળે છે. જ્યારે રો-સિલ્ક અને તુષાર સિલ્ક કુદરતી રીતે શરીરના તાપમાનને રેગ્યુલેટ કરે છે અને ઠંડી સામે રક્ષણ આપે છે.
કપડાંની પસંદગી હંમેશા ઋતુ મુજબની હોવી જોઈએ. જો તમે ગરમીમાં મલમલ, વરસાદમાં જોર્જટ અને શિયાળામાં સિલ્ક કે બનારસી ફેબ્રિક પસંદ કરશો, તો તમે આખો દિવસ આત્મવિશ્વાસ સાથે પસાર કરી શકશો અને સ્ટાઇલની સાથે હેલ્થ પણ જળવાઈ રહેશે.
