નવી દિલ્હી, 08 ઓક્ટોબર 2026: વડાપ્રધાન નરેન્દ્ર મોદીએ આજે નવી દિલ્હીના યશોભૂમિ ખાતે ‘ઇન્ડિયા મોબાઇલ કોંગ્રેસ’ની દસમી આવૃત્તિનું ઉદ્ઘાટન કર્યું. આ કાર્યક્રમ ટેલિકોમ્યુનિકેશન, ડિજિટલ કનેક્ટિવિટી અને તકનીકી નવીનતાના ક્ષેત્રમાં ભારતની નોંધપાત્ર પ્રગતિને પ્રદર્શિત કરે છે. ચાર દિવસીય આ પરિષદનો પ્રારંભ ગઈકાલે થયો હતો. આ વર્ષની થીમ ‘એક્સપાન્ડિંગ બિયોન્ડ બાઉન્ડ્રીઝ’ (સીમાઓથી પરે વિસ્તાર) છે, જે ડિજિટલ નવીનતા, આગામી પેઢીની કનેક્ટિવિટી અને ટેક્નોલોજી-આધારિત વિકાસમાં ભારતની વધતી જતી ક્ષમતાઓ પર પ્રકાશ પાડે છે.
આ પ્રસંગે સંબોધન કરતા વડાપ્રધાન નરેન્દ્ર મોદીએ જણાવ્યું હતું કે ‘ઈન્ડિયા મોબાઈલ કોંગ્રેસ’ના મંચે ભારતમાં ટેલિકોમ્યુનિકેશન ક્ષેત્ર અને ડિજિટલ કનેક્ટિવિટીનો વિકાસ નિહાળ્યો છે. તેમણે કહ્યું કે ટેલિકોમ ક્ષેત્રે ભારતની પ્રગતિમાં આ મંચે મહત્વપૂર્ણ ભૂમિકા ભજવી છે. મોદીએ નોંધ્યું હતું કે વર્ષો દરમિયાન, તે એક એવા મંચ તરીકે ઉભરી આવ્યું છે જે ભારતની પ્રગતિ અને આકાંક્ષાઓને પ્રદર્શિત કરે છે. વડાપ્રધાને ઉમેર્યું હતું કે આજે દેશના દરેક જિલ્લામાં 5G કનેક્ટિવિટી પહોંચી ગઈ છે. શ્રી મોદીએ કહ્યું કે ભારતમાં હાલમાં 5G કનેક્ટિવિટી કામગીરી માટે 5,50,000થી વધુ બેઝ સ્ટેશનો છે.
વડાપ્રધાન મોદીએ જણાવ્યું હતું કે ડિજિટલ કનેક્ટિવિટીને કારણે લોકો સુધી શિક્ષણ, આરોગ્યસંભાળ અને સરકારી સેવાઓ પહોંચાડવાનું સરળ બન્યું છે. તેમણે નોંધ્યું હતું કે આજે દૂરના ગામડાઓ અને ગરીબ પરિવારોમાં રહેતું દરેક બાળક ગુણવત્તાયુક્ત જ્ઞાન મેળવી શકે છે. મોદીએ ઉલ્લેખ કર્યો હતો કે છેલ્લા દસ-બાર વર્ષોમાં, મોબાઈલ ફોન માત્ર આધુનિક સંચારના માધ્યમમાંથી બદલાઈને સુશાસન માટેનું એક મહત્વપૂર્ણ સાધન બની ગયો છે. તેમણે ઉમેર્યું હતું કે હવે સેંકડો સરકારી સેવાઓ મોબાઈલ ફોન પર ઉપલબ્ધ છે. વડાપ્રધાને જણાવ્યું હતું કે ટેલિકોમ્યુનિકેશન ક્ષેત્રે આવેલી ક્રાંતિનો લાભ દેશની જનતાને મળ્યો છે. મોદીએ કહ્યું કે ‘ડાયરેક્ટ બેનિફિટ ટ્રાન્સફર’ દ્વારા લાભાર્થીઓના બેંક ખાતામાં અંદાજે 50 લાખ કરોડ સીધા જમા કરવામાં આવ્યા છે. તેમણે ઉમેર્યું કે આ પગલાને કારણે લગભગ 5 લાખ કરોડની બચત થઈ છે.
વડાપ્રધાન મોદીએ જણાવ્યું હતું કે સરકાર લગભગ ૨૫ કરોડ વિદ્યાર્થીઓને વિવિધ ડિજિટલ અને ઓનલાઇન શિક્ષણ પ્લેટફોર્મ સાથે જોડવાના પ્રયાસો કરી રહી છે. તેમણે ‘દીક્ષા’ (DIKSHA) પ્લેટફોર્મ દ્વારા ભારતમાં ડિજિટલ શિક્ષણના વધતા મહત્વ પર પ્રકાશ પાડતા ઉલ્લેખ કર્યો હતો કે કોવિડ-19 મહામારી દરમિયાન દીક્ષાના માધ્યમથી પાંચ કરોડથી વધુ સત્રો યોજવામાં આવ્યા હતા.
કેન્દ્રીય સંચાર મંત્રી જ્યોતિરાદિત્ય સિંધિયાએ જણાવ્યું હતું કે વડાપ્રધાન મોદીએ સતત એ વાત પર ભાર મૂક્યો છે કે ટેક્નોલોજી માત્ર અંતરિયાળ ગામડાઓ સુધી જ નહીં, પરંતુ દરેક નાગરિક સુધી પહોંચવી જોઈએ. તેમણે ટિપ્પણી કરી હતી કે ટેક્નોલોજીનો વ્યાપક સ્વીકાર ત્યારે જ શક્ય છે જ્યારે તે પરવડે તેવી અને સર્વસમાવેશક હોય. સિંધિયાએ નોંધ્યું હતું કે વર્ષ 2014માં એક ગીગાબાઇટ ડેટાની કિંમત 268 હતી, જે હવે ઘટીને માત્ર 8ની આસપાસ થઈ ગઈ છે. આનાથી ભારત વિશ્વમાં સૌથી ઓછા દરે ડેટા પૂરો પાડતા દેશોની હરોળમાં આવી ગયું છે.
સિંધિયાએ 5Gને વિશ્વભરમાં સૌથી ઝડપથી અપનાવવામાં આવતી ટેક્નોલોજી બનાવવા બદલ સાધનોના ઉત્પાદકો, ટેલિકોમ ઓપરેટરો અને ટેલિકોમ ક્ષેત્રના તમામ વ્યાવસાયિકોની પ્રશંસા કરી. તેમણે ઉલ્લેખ કર્યો કે ભારતમાં હાલમાં 55 કરોડ 5G ગ્રાહકો છે. તેમણે ઉમેર્યું કે ‘ઇન્ડિયા મોબાઇલ કોંગ્રેસ 2026’ ભારતની ક્ષમતાઓનું પ્રદર્શન કરશે.
આ કાર્યક્રમ વિશ્વભરના ટેક્નોલોજી ક્ષેત્રના દિગ્ગજો, નીતિ-નિર્ધારકો, ઉદ્યોગના નિષ્ણાતો, સ્ટાર્ટઅપ્સ, રોકાણકારો અને નવીનતા લાવનારાઓને એક જ મંચ પર એકત્રિત કરે છે. તેનો ઉદ્દેશ્ય ડિજિટલ ઇકોસિસ્ટમમાં ઉભરી રહેલી તકો અંગે ચર્ચા અને શોધ કરવાનો છે. આ વખતે, ‘ઇન્ડિયા મોબાઇલ કોંગ્રેસ’ ચાર નવા ક્ષેત્રોનો સમાવેશ કરીને તેના કાર્યક્ષેત્રનો વિસ્તાર કરી રહી છે. આમાં સ્માર્ટ મોબિલિટી, સ્ટેડિયમનો અનુભવ, ઔદ્યોગિક રોબોટિક્સ અને પરિવહન તકનીકનો સમાવેશ થાય છે. આ કાર્યક્રમમાં 100થી વધુ દેશોના 1,50,000થી વધુ સહભાગીઓ, 500થી વધુ ભાગીદારો અને પ્રદર્શકો તેમજ 600 સ્ટાર્ટઅપ્સ ભાગ લઈ રહ્યા છે.
વધુ વાંચો: છત્તીસગઢમાં કોલસા કૌભાંડની તપાસમાં 1,900 કરોડની લાયવી ગોટાળાનો ખુલાસો
