અમેરિકાએ ઈરાનના 4 આત્મઘાતી ડ્રોન તોડી પાડ્યા, રડાર સાઇટ્સ પર કર્યો બોમ્બમારો

ન્યૂયોર્ક, 6 જૂન 2026: મિડલ ઈસ્ટમાં ફરી એકવાર સૈન્ય ગરમાવો આવી ગયો છે. અમેરિકન દળોએ વ્યૂહાત્મક રીતે અત્યંત મહત્વપૂર્ણ ગણાતી હોર્મુઝ સ્ટ્રેટ નજીક ઈરાનના ચાર વન-વે એટેક (આત્મઘાતી) ડ્રોનને હવામાં જ તોડી પાડ્યા છે. આ સફળ સૈન્ય કાર્યવાહી બાદ અમેરિકાએ ઈરાનની દરિયાકાંઠાની સર્વેલન્સ રડાર સાઇટ્સ પર પણ જોરદાર બોમ્બમારો કરીને તેને તબાહ કરી દીધી છે.

યુએસ સેન્ટ્રલ કમાન્ડના જણાવ્યા અનુસાર, આ કાર્યવાહી અમેરિકન નૌકાદળના જહાજોની સુરક્ષા અને આંતરરાષ્ટ્રીય દરિયાઈ ટ્રાફિકને તાત્કાલિક જોખમોથી બચાવવા માટે ‘સ્વ-બચાવ’ અંતર્ગત કરવામાં આવી હતી. ઈરાની ડ્રોન અમેરિકી યુદ્ધ જહાજો માટે મોટો ખતરો બની રહ્યા હતા, જેને સમયસર નિષ્ક્રિય કરવામાં આવ્યા છે.

આ તરફ ઈરાને પણ મોટો દાવો કર્યો છે કે તેણે અમેરિકાના અત્યાધુનિક MQ-1 પ્રિડેટર ડ્રોનને તોડી પાડ્યું છે. ઈરાની સૈન્યના જણાવ્યા અનુસાર, આ અમેરિકી ડ્રોનને તોડી પાડવા માટે તેમણે પોતાની નવી અને સ્વદેશી ‘અરશ-એ-કમાંગીર’ એર ડિફેન્સ સિસ્ટમનો ઉપયોગ કર્યો હતો.

હોર્મુઝ સ્ટ્રેટ એ વૈશ્વિક તેલ વેપાર માટે પર્સિયન ગલ્ફ અને ઓમાનના અખાતને જોડતો એકમાત્ર દરિયાઈ માર્ગ છે. દુનિયાભરના ક્રૂડ ઓઈલનો આશરે 20 ટકા હિસ્સો આ સાંકડા માર્ગ પરથી પસાર થાય છે. આ વિસ્તારમાં અમેરિકા અને ઈરાન વચ્ચે વધતો તણાવ વૈશ્વિક બજાર અને સપ્લાય ચેઈન માટે ચિંતાનો વિષય બની શકે છે.