નેપાળમાં ફરી જળપ્રલયનો ખતરો? તિબેટમાં ડેમ તૂટવાની સૂચના બાદ પોલીસનું હાઈ-અલર્ટ

કાઠમાંડુ, 28 ઓગસ્ટ 2026: પડોશી દેશ નેપાળમાંથી એક મોટા અને ચિંતાજનક સમાચાર સામે આવ્યા છે. નેપાળ પોલીસે શુક્રવારે ફરી એકવાર હાઈ-અલર્ટ જાહેર કરતા જણાવ્યું છે કે તિબેટની તરફ પાણીનો ડેમ ફરીથી તૂટી ગયો હોવાની માહિતી મળી છે. આ ગંભીર જોખમને ધ્યાનમાં રાખીને પોલીસે તમામ સુરક્ષાકર્મીઓ, બચાવ તથા રાહત કાર્યમાં રોકાયેલી ટીમો અને સામાન્ય નાગરિકોને તત્કાલ સાવચેત રહેવા અને સુરક્ષિત સ્થળોએ ખસી જવાની અપીલ કરી છે.

નેપાળ પોલીસ દ્વારા સોશિયલ મીડિયા પર જાહેર કરવામાં આવેલા એલર્ટમાં કહેવામાં આવ્યું છે કે, તિબ્બેતી ક્ષેત્રમાં પાણીનો ડેમ તૂટવાના અહેવાલો છે, જેના કારણે નદીઓમાં જળસ્તર અચાનક વધી શકે છે. આ ચેતવણી એવા સમયે આપવામાં આવી છે જ્યારે આજે સવારે જ ચીનના સિચુઆન પ્રાંતમાં 5.1 તીવ્રતાનો ભૂકંપ નોંધાયો હતો. નેપાળ પોલીસના અધિકારી પી. ચૌધરીએ જણાવ્યું હતું કે, “નદીનું જળસ્તર વધવાની પૂરી શક્યતા છે, તેથી તમામ કામો તાત્કાલિક ધોરણે રોકી દેવામાં આવ્યા છે. બચાવ કામગીરીમાં લાગેલા તમામ વાહનો અને કર્મચારીઓને પાછા બોલાવી લેવામાં આવ્યા છે અને લોકોને સુરક્ષિત સ્થળે ખસેડવામાં આવી રહ્યા છે.” આ સંભવિત ખતરાને જોતા પ્રભાવિત વિસ્તારમાં તમામ પ્રકારના માર્ગ પુનઃનિર્માણના કાર્યો પણ સ્થગિત કરી દેવાયા છે.

• રસુવા દુર્ઘટના: મૃત્યુઆંક વધીને 469 થયો, 1400 થી વધુ લાપતા

નેપાળમાં અગાઉ આવેલા ભયાનક પૂર અને ભૂસ્ખલનની દુર્ઘટનામાં રાહત અને બચાવ કામગીરી હજુ પણ ચાલુ છે. નેપાળ પોલીસે આપેલી માહિતી મુજબ, રસુવા જિલ્લામાં આ કુદરતી આફતમાં મૃત્યુ પામનારાઓની સંખ્યા વધીને 469 પર પહોંચી ગઈ છે, જ્યારે હજુ પણ 1400 થી વધુ લોકો લાપતા છે. આ ભયાનક આપત્તિમાં મોટી સંખ્યામાં વિદેશી નાગરિકો પણ ફસાયા છે, જેઓ ટ્રેકિંગ, ગાઇડેડ ટૂર કે પવિત્ર હિન્દુ તીર્થયાત્રા માટે આ ક્ષેત્રમાં આવ્યા હતા. સુત્રોના જણાવ્યા અનુસાર, ગુમ લોકોમાં 113 નેપાળી પ્રવાસીઓ, સેના અને પોલીસના 85 સુરક્ષાકર્મીઓ તેમજ રસુવા જિલ્લાના 161 સ્થાનિક રહેવાસીઓ સામેલ છે. અત્યાર સુધીમાં આશરે 50 વિદેશી નાગરિકોને એરલિફ્ટ કરીને સુરક્ષિત બહાર કાઢવામાં આવ્યા છે.

• કેમ આટલું સંવેદનશીલ છે હિમાલયી ક્ષેત્ર?

વિશેષજ્ઞોના મતે, હિમાલયી ક્ષેત્ર અને તેની આસપાસનો વિસ્તાર દુનિયાના સૌથી સંવેદનશીલ અને આપત્તિ-સંભાવિત વિસ્તારોમાં ગણાય છે. આ વિસ્તારની ભૌગોલિક બનાવટ, ભૂગર્ભીય હલચલ (ટેક્ટોનિક મૂવમેન્ટ્સ) અને બદલાતા જ્યુગ્રાફિકલ તથા ક્લાઈમેટ ચેન્જના સંયુક્ત પ્રભાવોને કારણે અહીં અવારનવાર આવી ગંભીર દુર્ઘટનાઓનું જોખમ રહેલું છે.