છિંદવાડા: જિલ્લામાં 24 બાળકોના મોતનું કારણ બનેલા કોલ્ડ્રિફ સીરપ કેસમાં, SIT એ શ્રીસન ફાર્માને ઝેરી ડાયથિલિન ગ્લાયકોલ (DEG) સપ્લાય કરવાના આરોપી શૈલેષ પંડ્યાની ધરપકડ કરી છે. ધરપકડ બાદ, પંડ્યાને કોર્ટમાં રજૂ કરવામાં આવ્યો, જ્યાંથી તેને ત્રણ દિવસના પોલીસ રિમાન્ડ પર મોકલવામાં આવ્યો.
SIT તપાસમાં જાણવા મળ્યું કે શૈલેષ પંડ્યાએ કફ સિરપ બનાવવામાં વપરાતા રસાયણો ઉત્પાદક કંપનીને પૂરા પાડ્યા હતા. પ્રાથમિક તપાસમાં જાણવા મળ્યું છે કે સપ્લાય કરાયેલ DEG પ્રમાણભૂત ગુણવત્તાનું નહોતું. આ જ ઝેરી રસાયણનો ઉપયોગ કફ સિરપમાં કરવામાં આવ્યો હતો જેના કારણે બાળકોના મૃત્યુ થયા હતા.
ઝેરી કફ સિરપ પીવાથી 24 બાળકોના મૃત્યુના સંદર્ભમાં મધ્યપ્રદેશના છિંદવાડામાં આઠ મેડિકલ સ્ટોર્સના લાઇસન્સ સસ્પેન્ડ કરવામાં આવ્યા હતા.
મળતી માહિતી મુજબ, ડ્રગ ઇન્સ્પેક્શન ટીમે પારસિયાના દિનેશ મેડિકલ સ્ટોર્સ, કૈલાશ મેડિકલ સ્ટોર્સ, નિલેશ મેડિકોસ અને સુમિત મેડિકલ સ્ટોર્સનું સાત દિવસ અને ન્યુ સિટી મેડિકલ સ્ટોર્સનું 10 દિવસ, હરસોરિયા મેડિકલ સ્ટોર્સ અને રાય મેડિકલ સ્ટોર્સનું લાઇસન્સ 12 દિવસ માટે અને છિંદવાડા શહેરના ગુપ્તા મેડિકલ સ્ટોર્સનું લાઇસન્સ 15 દિવસ માટે સસ્પેન્ડ કરવામાં આવ્યું છે.