હનુમાનગઢી પહોંચેલા સીએમ યોગી આદિત્યનાથે આપ્યું નિવેદન,કહ્યું- દીપોત્સવ કાર્યક્રમની સાક્ષી બની છે દુનિયા

લખનઉ: ઉત્તર પ્રદેશના મુખ્યમંત્રી યોગી આદિત્યનાથ અયોધ્યા પ્રવાસે છે. અહીં તેમણે નિવેદન જારી કરીને કહ્યું કે દેશ અને દુનિયા અયોધ્યાના દીપોત્સવના સાક્ષી બન્યા છે. 54 દેશોના રાજદ્વારીઓ આવીને નવી અયોધ્યાના દર્શન કર્યા છે. દીપોત્સવનું ભવ્ય સ્વરૂપ એ જ શ્રેણીનો એક ભાગ હતું જે વડાપ્રધાન મોદીના વિઝન મુજબ આગળ વધી રહી છે.

દિવાળીનો તહેવાર આપણા બધા માટે સકારાત્મક ઉર્જાનો સંચાર કરવાનું માધ્યમ છે. હું દરેકને દિવાળીની શુભેચ્છા પાઠવું છું. આજે અયોધ્યા પહોંચેલા સીએમ યોગી આદિત્યનાથે હનુમાનગઢીમાં ભગવાનના દર્શન કર્યા હતા અને પૂજા આરતી કરી હતી.

યુપીના અયોધ્યામાં શનિવારે દીપોત્સવ કાર્યક્રમનું આયોજન કરવામાં આવ્યું હતું. આ કાર્યક્રમ અંતર્ગત સરયુ નદી પર બનેલા 51 ઘાટો પર 24 લાખથી વધુ દીવા પ્રગટાવવાનો લક્ષ્યાંક રાખવામાં આવ્યો હતો. જો કે આ સમયગાળા દરમિયાન 51 ઘાટ પર 22 લાખ 23 હજાર દીવા પ્રગટાવવામાં આવ્યા હતા. રામ મંદિરની અંદર 50 હજાર દીવા પ્રગટાવવામાં આવ્યા હતા. સમગ્ર અયોધ્યામાં 24 લાખથી વધુ દીવા પ્રગટાવવામાં આવ્યા હતા.

આ સાથે આ વર્ષે અયોધ્યાએ વધુ એક રેકોર્ડ પોતાના નામે કર્યો છે.આ દીવાઓ પ્રગટાવવામાં 25 હજારથી વધુ સ્વયંસેવકોએ ભાગ લીધો હતો. આ દરમિયાન 50 થી વધુ દેશોના ઉચ્ચાયુક્તો અને રાજદૂતો હાજર રહ્યા હતા.

સીએમ યોગી શનિવારે બપોરે અયોધ્યા પહોંચ્યા હતા. સીએમ યોગી, રાજ્યપાલ આનંદી બેન પટેલ, નાયબ મુખ્યમંત્રી બ્રજેશ પાઠક સહિત ઘણા મોટા નેતાઓ અહીં પહોંચ્યા હતા. અહીં ભગવાન રામ, માતા સીતા અને લક્ષ્મણના સ્વરૂપોનું તેમણે તિલક લગાવ્યું અને પૂજા કરી. ભગવાન રામ, માતા સીતા અને લક્ષ્મણ અહીં હેલિકોપ્ટર દ્વારા આવ્યા હતા.

આ પછી તેઓ રથમાં બેસીને અયોધ્યા જવા રવાના થયા. આ દરમિયાન આ રથને સીએમ યોગી આદિત્યનાથે પણ ખેંચ્યો હતો.અયોધ્યાએ લાખો દીવા પ્રગટાવવાનો રેકોર્ડ ગીનીસ બુક ઓફ વર્લ્ડ રેકોર્ડમાં નોંધાવ્યો છે.